9 muaj pas arrestimit të bujshëm në kuadër të operacionit Oaz, një nga personazhet më të lakuara të vitit 2018, i akuzuar si i përfshirë në një sërë ngjarjesh kriminale, Safet Rustemi (Bajri), rikthen vëmendjen…
Në një video të publikuar në profilin e Instagramit të Safet Bajrit, profil që zotërohej nga Bajri para arrestimit, shihet ambienti i qelisë, një frigorifer mbi të cilin qendron një televizor plazma, dhe dritarja e derës prej çeliku.
Bajri ka zgjedhur të publikojë një pasazh nga aktori Gazmend Paja në rolin e Melamin Beratit, një trafikant droge, që kërkon të krijojë qeveri.
“Unë sot para jush kam formuar qeverinë time, dhe do të zbardhë listën që ta shihni të gjithë këtu. Vazhdojmë pra me listën se nuk mban më ujë pilafi. Hiqni këto ore, hiqni. Po na gënjejnë dita-ditës, po ne s’kemi bythë për karrige. Zoti kryeministër, syri dhe krahu im i djathtë…”-thotë aktori, dhe në sfond dëgjohet Safet Bajri që qesh.
Bajri do duhej që të ishte në kushte të rrepta sigurie, siç edhe është njoftuar në qelitë e burgut 313 në Tiranë, por ende nuk dihet si është e vërteta e kësaj videoje.
Por burime për Dosja.al, bëjnë me dije se Bajri ka në posedim një aparat celular në qelinë e tij.
Iu mbetet institucioneve përkatëse të japin sqarime me këtë video, në një kohë kur telefonat janë të ndaluar në burgje.
Safet Bajri u lirua më 1 shkurt 2019, për 4 orë, për të marrë pjesë në funeralin e të atit, Jonuz Bajri, 77-vjeç, në Shkodër, i cili kishte ndërruar jetë një ditë më parë.
Kush është Safet Bajri?
Safet Bajri akuzohet nga Krimet e Rënda si kreu i një grupi kriminal që kryente trafik droge, vrasje dhe trukim ndeshjesh.
Ai u prangos në shtator të 2018 gjatë një operacioni masiv policor të FNSH-së dhe RENEA-s që çoi në arrestimin e 11 të fortëve, anëtarë të bandës kriminale “Bajri” në Shkodër.
Për Safet Bajrin ka një dënim edhe nga drejtësia belge për shfrytëzim prostitucioni. Në momentin e arrestimit, Safet Bajri ka qenë në një bilardo në zonën e Xhamllikut, dhe sapo kanë hyrë forcat RENEA, ai ka hedhur armën e zjarrit pistoletë e cila megjithatë është konstatuar nga efektivët e policisë.
Grupi kriminal “Bajri” nga Dobraçi i Shkodrës akuzohet për vrasje me dashje, gjobëvënie, trafik droge dhe pastrim parash. Anëtarë të këtij grupi kriminal akuzohen edhe si autorë të disa prej ngjarjeve kriminale që kanë tronditur kryeqendrën e veriut.
/Dosja.al/
