Kryetari i Partisë Demokratike, Lulzim Basha premtoi gjatë një takimi me diasporën shqiptare në Londër, se nuk do të ketë taksë në rrugën Tiranë-Durrës kur PD të jetë në pushtet. Basha u zotua gjithashtu, se në qeverinë e nesërme të PD-së, do hiqet taksa në Rrugën e Kombit.
“Mua m’u ngarkua detyrë ndërtimi i rrugës dhe më dhemb në zemër të shoh që diçka qe u bë me lekët e shqiptarëve tani u kërkojnë shqiptarëve të paguajnë 2-3 fish. Paguajnë edhe taksën e rrugës, edhe taksën e qarkullimit. Asnjëra prej tyre nuk do të ekzistojë kur PD të jetë në pushtet. Pse nuk do të ekzistojnë? Sepse të dyja varfërojnë shqiptarët. Duke i hequr këto të dyja, ne mundësojmë që të ketë më shumë qarkullim. Kjo është ndarja me thikë midis atyre që e kanë mendjen vetëm tek taksat, vetëm tek shtrëngimi, që është Shqipëria e frikës dhe Shqipërisë së lirisë. Shqipëria dhe shqiptarët do të pasuruhen shumë më shumë me taksa të ulëta, sepse do të kenë më shumë motiv për të punuar dhe vetëm puna dhe inicistiva e lirë e pasuron një komb”, deklaroi kryedemokrati.
Basha ndodhet në Londër ku përveç diasporës shqiptare, ka zhvilluar takime me politikanë të lartë të vendit.