Policia ka vënë në pranga 3 persona për shpërndarje kokainë në Tiranë, ndërsa një i katërt është proceduar penalisht.
Mes të arrestuarve është edhe menaxheri i një lokali, bënë me dije këtë të shtunë burime zyrtare nga Policia e Tiranës.
Të arrestuarit
- Albi Bulku, 31 vjeç, banues në Tiranë, për veprën penale “Prodhim dhe shitje të lëndëve narkotike” dhe “Përshtatje e lokalit për përdorim droge”.
- Aldo Kodra, 23 vjeç, banues në Tiranë, për veprën penale “Prodhim dhe shitje të lëndëve narkotike”, “Largim i të burgosurit nga vendi i qëndrimit”, person me precedent të theksuar kriminal për lëndë narkotike, vjedhje, krime kundër personit dhe për armbajtje pa leje.
- Enzo Meçi, 26 vjeç, banues në Tiranë, për veprën penale “Prodhim dhe shitje të lëndëve narkotike”, “Largim i të burgosurit nga vendi i qëndrimit”, person me precedent të theksuar kriminal në fushën e narkotikëve.
- Si dhe u procedua në gjendje të lirë shtetasi A.D., 26 vjeç, banues në Tiranë, për veprën penale “Moskallëzim Krimi”.
Aksioni
Operacioni i koduar “Orët e Vona” u krye mbrëmjen e djeshme nga Seksioni për Hetimin e Narkotikëve në DVP Tiranë në bashkëpunim me forcën e posaçme “Shigjetat”.
Burime zyrtare nga Policia e Tiranës bënë me dije se: Nga ana e Seksionit për Hetimin e Narkotikëve të Drejtorisë Vendore të Policisë Tiranë, janë marrë informacione në rrugë operative se në rrugën “Sulejman Delvina” në një lokal ‘Bar kafe’, persona të ndryshëm e frekuentonin duke pirë e shpërndarë lëndë narkotike.
Nga kontrolli i kryer nga e punonjësve të policisë të Seksionit për Hetimin e Narkotikëve të DVP Tiranë, në ambientet e lokalit të cilin e kishte me qera dhe menaxhonte shtetasi Albi Bulku, Policia gjeti dhe sekuestroi 12 doza të dyshuara me lëndë narkotike kokainë.
Në momentin e kontrollit nga Policia në lokal ndodheshin shtetasit Albi Bulku, Aldo Kodra, Enzo Meçi dhe A. D, të cilët janë shoqëruar në DVP Tiranë dhe në përfundim të veprimeve është bërë arrestimi në flagrancë i shtetasve Enzo Meçi, Aldo Kodra, Albi Bulku. U procedua në gjendje të lirë shtetasi A.D, si dhe u sekuestruan në cilësinë e provës materiale:12 doza kokainë, 4 aparate celular dhe 1 automjet. /bn/
