Arben Skënderi, ish-anëtar i kryesisë së PD-së, do të kandidojë përballë Erjon Veliajt në zgjedhjet lokale të 30 qershorit, në emër të Bindjes Demokratike të drejtuar nga Astrit Patozi.
Bindja Demokratike do të kandidojë në 26 njësi vendore, ndërsa në disa të tjera do të mbështesë kandidatët e shpallur të pavarur, përballë atyre të PS-së.
Ndërkohë në Tiranë, një tjetër emër nga rradhët e PD-së do të kandidojë për Bindjen për këshilltar bashkiak.
Fabian Topollaj, aktualisht këshilltar në Këshillin Bashkiak të Tiranës, dhe ish-anëtar i Këshillit Kombëtar të PD-së, do të kryesojë listën e kandidatëve të kësaj force politike.
Topollaj ishte pjesë e kritikëve brenda PD-së kundrejt Lulzim Bashës, kryetar i kësaj force politike.
Topollaj dha dorëheqjen nga Këshilli Bashkiak i Tiranës pak kohë më parë, ndërsa iu bashkua Bindjes Demokratike nga momenti i krijimit të kësaj partie.
