Renaldo Kalari ka festuar si i çmendur pas fitimit të titullit kampion. Postderbi solli shpërthimin e tij, ndërsa u ngjit në pankinë dhe në rrëshqitje e sipër doli në anën tjetër të stadiumit, aty ku e priste i ati. Një tifoz i thekur i Partizanit edhe babai i Kalarit, i cili është oficer policie. Mbrojtësi i linjës së majtë ka marrë Kupa Shqipërie e Superkupa, por pa dyshim që ky është trofeu më i rëndësishëm gjatë karrierës së tij.
Në një intervistë të dhënë enkas për “Panorama Sport”, ai ka sqaruar se festa nuk kishte lidhje me derbin apo situatën e Tiranës, por vetëm me titullin e fituar. Ai na zbulon edhe një tjetër detaj që nuk e ka thënë më herët. Ai kujton se titullin e 26 viteve më parë të të kuqve e ka shijuar si tifoz, ndërsa të dielën dha kontributin e tij si lojtar i kësaj skuadre.
Renaldo, ajo që spikati më shumë pas fitores në derbi ishte festa juaj “e çmendur”…
Me thënë të drejtën, para 26 viteve kam qenë në stadium, kur Partizani ka dalë kampion për herë të fundit. Nuk e di asnjë, por bashkë me babanë tim i kam ndjekur të gjitha ndeshjet e atij sezoni nëpër stadiumet e Shqipërisë dhe kam festuar si i çmendur. Gjithçka ia dedikoi babait tim, prandaj festova si i çmendur, pasi ishin 26 vite pritje për këtë titull kampion.
Babai im e priste si tifoz këtë arritje, por me djalin e tij në fushë, them se ka qenë gjëja më e bukur që mund t’i ndodhte atij. Kam shumë miq e shokë te Tirana, që mund të jenë mërzitur për festimin tim. Dua t’i sqaroj ata se kam festuar për titullin kampion dhe s’ka fare lidhje me humbjen apo situatën e Tiranës.
Pra, jeni i vetmi në ekipin aktual që e keni parë Partizanin duke festuar titullin kampion në stadium?
Po, kjo është e vërtetë. E mbaj mend shumë mirë atë sezon të largët të 1993-shit, ku në përfundim kam bërë edhe një foto me Marko Pelinxhin në stadium bashkë me kupën. Ka qenë një emocion shumë i bukur. Dhe mezi e prisja dhe e ëndërroja këtë ditë.
Keni luajtur me Tiranën, por a e konsideroni arritje të madhe të sigurosh titullin kampion në derbi?
E para, ajo që na intereson si Partizan është fitimi i titullit kampion. Fitorja në derbin e fundit na duhej për veten tonë. Realisht më vjen keq për Tiranën dhe mos e thëntë Zoti që ata të shkojnë sërish në Kategorinë e Parë. Besoj dhe mendoj se kjo gjë nuk do të ndodhë dhe Tirana të mbetet pjesë e Superiores. Në këtë derbi të fundit, ne menduam vetëm për veten tonë që të shpalleshim kampionë dhe për asgjë tjetër.
Kujt ia dedikoni këtë titull kampion?
Në radhë të parë, ia kushtoj familjes sime që më ka qëndruar pranë gjatë gjithë rrugëtimit tim në futboll, por në mënyrë të veçantë babait tim. Pastaj dedikimi më special shkon për gjithë tifozët dhe familjen e madhe të Partizanit, që kanë pritur 26 vite të vijë kjo ditë e madhe.
