“Borchardt turp t’ju vijë” ishte mesazhi që një grup të rinjsh kanë zgjedhur t’i përcjellin Ambasadorit të OSBE-së në Tiranë, pas një deklarate të kësaj organizate lidhur me protestën e së shtunës të thirrur nga opozita.
Mesazhi, që u shkrua në hyrje të pallatit ku jeton Borchardt është trajtuar si një kërcënim për Ambasadorin e OSBE-së, megjithëse Shqipëria mund të jetë i vetmi vend jo në Europë, por në Botë, që më shumë adhuron ambasadorët dhe diplomatët që vijnë për disa kohë në këtë vend, sesa politikanët vendas, në partitë e të cilëve mund të militojnë.
Megjithatë, ky mesazh u trajtua si kërcënim, fillimisht nga ministri në detyrë i Punëve të Jashtme, Gent Cakaj, pastaj nga kryeministri Edi Rama, dhe në fund me një reagim të OSBE dhe ambasadorëve të akredituar në Tiranë.
Nga mazhoranca janë hedhur akuza në drejtim të opozitës mbi atë që konsiderohet kërcënim ndaj Borchardt, ndërsa PD në reagimin e saj ka thënë se “është e dënueshme çdo përpjekje propagandistike e qeverisë për ta kundërvënë Partinë Demokratike me partnerët tanë, si në rastin e mbishkrimeve në banesën e ambasadorit të OSBE-së. Ne i kërkojmë prokurorisë të zbulojë kush janë autorët e këtij akti të shëmtuar dhe t’i vërë ata përpara përgjegjësisë”.
Nga një video të publikuar në opinion.al shihet një grup të rinjsh që kanë shkuar në pallatin ku banon ambasadori Bernd Borchardt ditën e protestës, të shtunën. Me duartrokitje dhe në kor në anglisht ata thonë: Borchardt turp për ju! Po ashtu në hollin e pallatit është shkruar e njëjta parullë: Borchardt turp për ju!
Nuk dihet nëse këta të rinj i përkasin partive opozitare, mazhorancës apo janë një lëvizje jashtë dy kahjeve politike.
