Orges Shehi nuk ka dashur të flasë pas ndeshjes, ndaj para mediave doli zv.trajneri Gentian Liçi. Ai është shfaqur i shqetësuar dhe mërzitur për këtë humbje, ndërsa nuk kurseu as kritikat për gjykimin.
“Nuk duam të justifikohemi, por them se ka qenë një ndeshje tipike ku gjykimi na ka dëmtuar shumë. Këtu nuk dua të ngre alibi, ama kemi pretendimet tona për mënyrën e gjykimit nga kryesori i ndeshjes, por edhe nga anësorët. Kemi pretendime për një gol të paktën që ishte i parregullt nga Teuta.
Por, edhe penallti e munguar për ne. Janë gjëra që ndikojnë. Për të mos thënë më pas edhe vendimet e anësorëve që acarojnë mjaft lojtarët në fushë dhe bëjnë që të humbasin qetësinë. Gjithsesi, është një humbje e rëndë, pasi ishte finale e sezonit dhe duhet të kishim bërë mirë në këtë ndeshje.
Tani vështirësohet tepër rruga për në Europë. Duhet që të fitojmë ndeshjet e mbetura dhe të presim që të gabojnë të tjerët. Nuk është më në dorën tonë. Kishim këtë takim që duhet ta fitonim dhe nuk ia dolëm. Ishte një finale. Prandaj, jemi të mërzitur mjaft. Duhet të rikuperojmë dhe të luajmë të përqendruar ndeshjen e radhës”, u shpreh numri dy i stolit të Skënderbeut.
