Analisti Klementin Mile në një shkrim të publikuar në gazetën ‘Liberale’ kritikon mënyrën se si Blendi Fevziu po përzgjedh temat për emisionin ‘Opinion’, zakonisht gjatë të enjtes, kur emisionet politike arrijnë kulmin e audiencës.
Mile thotë se Fevziu është duke i bërë një shërbim të madh Qeverisë sepse në emisionet e tij nuk po flitet më për krizën politike dhe për protestat.
“Fevziu, në fakt, është duke bërë një shërbim të madh. Por jo interesit publik. As medias ku punon. As medias në përgjithësi. Ai është duke i shërbyer qeverisë që të mos flitet për krizën politike në platformën televizive më të ndjekur nga shqiptarët. Në emisionin “Opinion” këto kohë mund të flitet për “Rinasin”, “Enverin”, “Hashimin”, “fallin” dhe “ushqimin”, por kurrsesi për “qeverinë tranzitore”, “opozitën e re”, “protestat” dhe “zgjedhjet”, shkruan Klement Mile.
Duke e konsideruar një gazetar me përvojë dhe të sprovuar, Mile ngre dyshime nëse është koinçidencë fakti që Blendi Fevziu filloi t’i zëvendësojë temat politike thelbësore të “Opinionit” me tema ekzotike, historike dhe rajonale, menjëherë sapo opozita doli nga Parlamenti dhe mazhoranca vendosi të mos dërgojë përfaqësues në debate me ta.
“Kjo është një krizë e jashtëzakonshme për sistemin, çka është e pamundur të mos e kuptojë një gazetar i vjetër, i sprovuar dhe shumë i njohur si Fevziu. Përpos të qenët gazetar, ai është edhe publicist i njohur, pra ka lexuar dhe vazhdon të lexojë literaturë teorike, e kjo na e heq çdo dyshim se ai mund të jetë duke mos e kuptuar thelbin e situatës politike të vendit”, shkruan ndër të tjera Mile.
