Në prag të zyrtarizimit të titullit, te Partizani kanë luksin të mendojnë që tani për merkaton e verës. “Panorama Sport” zbulon nga burime të sigurta në klubin e kuq se dy lojtarët e piketuar nga kampionati shqiptar janë pjesë e Kastriotit të Krujës, që në këtë fundsezoni po lufton për mbijetesë në Superiore.
Mesfushori i qendrës, Julian Shehu, që është vetëm 20 vjeç, si dhe sulmuesi i krahut, Patrik Bardhi, gjithashtu 20 vjeç, janë objektivat kryesorë. Strategjia që po ndjekin drejtuesit është e qartë: të afrojnë të rinj të talentuar për të pasur mundësinë për t’i shitur në një të ardhme të afërt drejt klubeve europiane.
Te Partizani duan që të mos i lënë asgjë rastësisë, pasi lojtarët që shkëlqyen këtë sezon si Esat Mala, Jasir Asani dhe Jurgen Bardhi, në çdo moment mund të shiten në rast se në klub vjen një ofertë e parefuzueshme. Gazeta mëson se bisedimet janë në fazën fillestare, por për të arritur te akordi me lojtarët, klubi i kuq duhet që së pari të gjejë marrëveshjen me Kastriotin.
Të dy lojtarët janë nën kontratë edhe për dy sezone të tjera me klubin krutan. Bardhi erdhi si lojtar i lirë nga Tirana, ku luajti një vit në Kategorinë e Parë me fanellën bardheblu, ndërsa mesfushori Shehu është rritur në futbollin grek, duke nisur karrierën si profesion ist te Paniliakos.
Gjatë këtij sezoni debutues në Superiore, të rinjtë kanë qenë titullarë të padiskutueshëm te Kastrioti. Shehu ka arritur të shënojë edhe tre gola, ndërsa Bardhi një gol, pikërisht në portën e Tiranës. Burime në klubin e kuq tregojnë se lojtarët janë ndjekur me kujdes nga trajneri Skënder Gega, i cili ka dhënë OK-in që klubi të futet në bisedime konkrete, në mënyrë që t’i ketë për sezonin e ardhshëm.
/PANORAMASPORT.AL/
