Është konfirmuar nga Gjykata e Lartë, masa me ‘arrest shtëpie’ për dy ish-deputetët Arben Çuko dhe Arben Ndoka. Ky i fundit ka kundërshtuar sërish vendimin e drejtësisë duke kërkuar të zbardhen të gjitha përgjimet që janë marrë si provë ndaj tij duke ngritur akuzat se kjo është një lojë e pisët e drejtësisë në Shqipëri.
“Arrestimi im është lojë e Prokurorisë. Dua që përgjimet e mia të bëhen publike pasi unë nuk e di që jam përgjuar. Nuk jam i përfshirë në një grup që tjetërson pronat.” tha Ndoka në seancë.
Ish-deputeti socialist Arben Ndoka akuzohet për falsifikim të dokumenteve, vulave, stampave ose formularëve, shpërdorimi i tokës në kuadër të një grupi kriminal, të përfshirë në tjetërsim tokash në zonën bregdetare në Qarkun e Lezhës. Sipas burimeve nga grupi hetimor, Ndoka së bashku me disa zyrtarë të tjerë në Lezhë kanë ndikuar në tjetërsimin e pronave te “Rana e Hedhun” dhe në Kune nga ranishte në tokë arë dhe më pas i kalonin te të afërmit e tyre.
Çuko dyshohet se është i përfshirë në korrupsion pasiv gjatë kohës që ushtronte detyrën e drejtorit të Burgjeve. Urdhërarresti u ekzekutua sot pasdite dhe aktualisht Çuko është i ndaluar në ambientet e Drejtorisë së Policisë së Tiranës”, njoftoi dje zyrtarisht Policia.
