Opozita e bashkuar, nën drejtimin e Partisë Demokratike, do të prezantojë sot programin e detajuar lidhur me detyrat e Qeverisë tranzitore, ku në thelb mbeten sigurimi i zgjedhjeve të lira.
Rreth orës 11:00 drejtues të partive opozitare do të shpalosin bashkarisht detyrat e qeverisë tranzitore për të garantuar zgjedhje të lira dhe të ndershme.
Një ditë më parë kreu demokrat, Lulzim Basha, deklaroi se po punojmë intensivisht për programet tona politikke, ekonomike, ofertën tonë për shqiptarët jo vetëm për ta nxjerrë vendin nga kriza por për tu dhënë siguritë, mundësitë për një jetë dinjitoze me mundësi për punësim dhe mirëqënie për të gjithë.
Pritet të propozohet që qeveria tranzitore të ketë një mandat 3-6 muaj, ndërsa pjesë e punës së saj të jetë edhe Reforma Zgjedhore, në kushtet kur opozita ka lënë sallën e Kuvendit dhe vendet e saj në Komisionin e Reformës Zgjedhore janë plotësuar nga deputetë të asaj që quhet “opozita e re”.
Opozita ka kushtëzuar pjesëmarrjen në zgjedhje me largimin e Edi Ramës nga posti i kryeministrit, si dhe krijimin e një qeverie tranzitore.
