Ish-ministri i drejtësisë, Ylli Manjani, ka reaguar pas denoncimeve të shumta që janë bërë nga qytetarët se ju është falsifikuar firma me qëllim krijimin e Bindjes Demokratike të Astrit Patozit.
Përmes një postimi në rrjete sociale, Manjani shkruan se ai do ta kishte dhënë me shumë dëshirë firmën e tij për themelimin e kësaj partie, por nuk është aspak dakord që dikush t’ia vjedhë firmën siç është vepruar me qytetarët shqiptarë.
Ja postimi i Manjanit:
Sinqerisht do ja kisha dhënë firmën time organizatorëve të Bindjes Demokratike, po tu duhej për rregjistrim.
Natyrisht nuk do ti kisha votuar, as do bëhesha anëtar i Bindjes, por firmën sa për t’u rregjistruar si subjekt po, me qejf do ua kisha dhënë.
Fundja, le të bëhet edhe një parti më shumë!
Do e kisha bërë me vullnet të plotë, dhe po t’u duhet e bëj dhe tani, vetëm të heqin nga lista e themeluesve firmat fallco.
Është shumë më e ndershme t’i thuash tjetrit “ kam nevojë për firmën tënde, sesa tja vjedhës”…
Kjo nuk i nderon fare! Përkundrazi i kompromenton rëndë në mision e qëllim që në nisje të aktivitetit politik.
