Fitorja ndaj Rumanisë dhe ecuria pozitive e Kombëtares në Kampionatin Europian ka kthyer vëmendjen e gjithë medieve ndërkombëtare.
Së fundmi ka qenë prestigjiozja madrilene ‘AS’ e cila i ka kushtuar një hapësirë të madhe paraqitjes së kuqezinjve në ‘Euro 2016’.
Në një analizë kjo gazetë kthen kohën pikërisht në vitin 2011 ku futbolli shqiptar mori një ndryshim rrënjësor pasi në krye të pankinës kuqezi vjen strategu italian Gianni De Biasi.
“Në atë kohë, Shqipëria renditej në vendin e 74 të klasifikimit të FIFA-s dhe kishte në përbërje lojtarë me cilësi modeste. Ndërsa një tjetër problem ishte edhe mosha e madhe e lojtarëve dhe ndryshimi i brezave”, shkruan ‘AS’, raporton Syri.net.
Një punë e madhe dhe kolosale u ndërtua tek kjo Kombëtare e cila jo vetëm u rrit në cilësi por mori një revolucion duke lënë një të ardhme premtuese me lojtarë të rinj shumë të talentuar.
Për të ndërtuar këtë grup lojtarësh De Biasit iu desh të udhëtonte në mbi 70 vende të ndryshme për të bindur lojtarët e rinj që t’i bashkoheshin projektit të tij tek Shqipëria.
“Ai arriti të kontaktonte me shumë shqiptarë të talentuar, veçanërisht në Zvicër”, shkruan AS.
Në përfundim të analizës një tjetër fakt pikant është që De Biasi tashmë është i pajisur me pasaportë shqiptare por jo vetëm kaq pasi ai është integruar me zemër tek kuqezinj dhe këndon himnin njësoj si shqiptarët e tjerë, mbyll shkrimin gazeta spanjolle.
