Partia Socialiste ka nënshkruar marrëveshjen me 23 parti të tjera duke formësuar në këtë mënyrë koalicionin Aleanca për Shqipërinë Europiane.
Në këtë mënyrë, kryeministri Edi Rama, njëherazi kryetar i PS-së, ka vendosur që të ndajë tepsinë e pushtetit me aleatët, në varësi të peshës së tyre elektorale.
Dy vjet pasi kërkoi tepsinë e pushtetit për vete, duke ndërtuar të gjithë fushatën e zgjedhjeve të 2017-ës kundër aleatëve të tij, që i akuzonte se hynin në koalicione me të mëdhenjtë për të marrë pjesë në tepsinë e qeverisjes, Rama kërkoi timonin i vetëm.
Por dy vjet pas, marrjes së timonit të qeverisjes dhe tepsisë, në një situatë të tensionuar politike, kur opozita ka dorëzuar mandatet e deputetëve dhe ka nisur aksionin e mosbindjes civile, Rama ka zgjedhur të ndërtojë një koalicion, ku veç dy apo tre subjekteve që të paktën njihen si PSD, PDS apo Aleanca Demokratike, të tjerat janë pothuajse parti inekzistente.
Mes subjekteve që kanë firmosur marrëveshjen është edhe G 99, e drejtuar nga zv.ministri i Arsimit, i cili ka marrë këtë detyrë vetëm dy muaj më parë.
Në marrëveshje, në faqen 4 të saj, përcaktohet se aleatët, në bazë të peshës së tyre, të kontribuojnë në të gjitha nivelet e qeverisjes vendore, bazuar të platformën e bashkëpunimit. Kjo do të thotë se sa më shumë vota të marrë një subjekt, aq më shumë poste apo përfaqësim do të ketë në qeverisjen e Rilindjes.
Në këtë mënyrë duket se Rama ka vendosur, që të paktën për pushtetin lokal, sikundër ka ndërtuar marrëveshjen, të ndajë pushtetin apo tepsinë me aleatët, e rinj dhe të vjetër, që dy vite më parë i cilësonte si pengmarrës në ankandet mes dy partive të mëdha.
“Kjo është histori pengmarrjeje. Ose do ta pranosh këtë dhe do të bësh koalicion, ose tjetri ikën dhe kap më shumë te tepsia e tjetrit. Dy partitë e mëdha janë bërë pengje të këtij lloj ankandi. Kjo nuk ka lidhje me demokracinë, përfaqësimin dhe shtetin.
Demokracia nuk është anarki dhe nuk është Pazar. Kush vjen për koalicion vjen për program, jo për tepsi. Ose hajde për program, ose ik. Kërkesa të tipit unë dua këtë, unë dua atë, fute këtë këtu nuk mund të ketë më”, deklaronte Rama në 2017, kohë kur zhvillohej fushata zgjedhjet e 25 qershorit.
Nuk dihet se pse ka ndryshuar mendim Edi Rama ndaj partive të vogla që sot ka firmosur krijimin e një koalicioni, apo pse ai dy vjet pasi mori tepsinë dhe timonin, është i gatshëm të ndajë postet apo të pranojë pasagjerë në makinën e tij./Boldnews.al/
