Skënderbeu fiton pastër 2-0 me Flamurtarin në Korçë dhe ndez luftën për vendin e tretë të Superiores, pozicion që e pretendojnë plot katër ekipe.
Pas javës së 31-të nga Flamurtari i vendit të tretë e deri te Laçin i vendit të gjashtë ndahen me vetëm 3 pikë.
Sa i përket përballjes së zhvilluar në stadiumin “Skënderbeu”, ekipi korçar u shfaq dominues në lojë, duke e gjetur dy herë rrugën e rrjetës, fillimisht me Blerim Krasniqin në pjesën e parë, pas një kombinimi të bukur me Otto John, dhe në të 86-ën me Gjergji Muzakën, që shndërroi në gol me “Panenka” penalltinë e fituar nga Krasniqi.
Flamurtari bëri shumë pak në këtë transfertë për të shmangur humbjen, i ndikuar edhe nga organika e kufizuar pas shumë largimeve në janar.
Gjithsesi, skuadra e Ilir Dajës ka shanse shumë të mira për ta mbyllur sezon në vendin e tretë, që do të ishte arritje e madhe për kuqezinjtë, duke marrë në konsideratë krizën institucionale që po kalojnë.
