Teksa kryeministri Edi Rama ka planifikuar të shkojë në Elbasan këtë të shtunë, opozita dhe qytetarët kanë dalë në protestë te rreth-rrotullimi i Brandasheshit.
Ata kanë bllokuar rrugën hyrëse për në qytet.
Në vendngjarje kanë shkuar efektivë policie, mes tyre dhe forca speciale, dhe janë përplasur me protestuesit. Efektivët e policisë kanë shtyrë me forcë ish-deputetët e PD-së të pranishëm në protestë si Luçiano Boçi, Edmond Spaho, dhe Endri Hasa si dhe protestues të tjerë, për të liruar rrugën. Ndërsa këta të fundit, mes thirrjeve “Rama ik”, kanë kundërshtuar të lirojnë rrugën.
“Të marr zvarrë”, i drejtohet në një moment një prej efektivëve të policisë një protestuesi.
Megjithatë, pas disa minutash përplasje, të detyruar nga policia, protestuesit janë vendosur në bankinë, duke liruar korsinë e kalimit të automjeteve në rrugën kryesore ku kaloi edhe eskorta e kryeministrit Edi Rama.
Një protestë e ngjashme u zhvillua edhe dje, teksa kryeministri Edi Rama udhëtonte drejt Shkodrës, ku qëndroi në kuadër të turit “Bashkia që duam”.
/bn/
