Ka përfunduar pas 60 minutash takimi mes Ambasadorit të BE-së në Tiranë, Luigi Soreca, dhe drejtuesve të disa prej partive të vogla opozitare.
Në takimin e nisur në orën 16:00, në zyrat e Delegacionit të BE-së, ishin Fatmir Mediu, Nard Ndoka, Dashamir Shehi, Vangjel Dule, Agron Duka.
Në takim është diskutuar mbi situatën politike në vend, e cila po shkon drejt tensioneve veçanërisht pas radikalizimit të lëvizjeve të opozitës, e cila pasi dorëzoi mandetet e deputetëve ka nisur një seri protestash, që sot kulmojnë me bllokimin e disa prej akseve kombëtare.
Pas takimit, kreu republikan, Fatmir Mediu, tha se ambasadori Soreca është pro dialogut. Ai shtoi se do ti bëjnë thirrje Presidentit të Republikës të thërrasë një tryezë pozitë-opozitë për zgjidhjen e ngërçit politik në vend.
“Ky është një takim i thirrur nga ne sepse është e nevojshme të gjejmë një zgjidhje që t’i shërbejë interesave të Shqipërisë. Secili duhet të luajë rolin e vet. Presidenti duhet të thërrasë tryezën e partive politike për të parë nëse janë plotësuar kushtet për zgjedhje të lira e të ndershme.
Me kontributin e të gjitha palëve politike ne të arrijmë të sigurojmë zgjedhje të lira e të ndershme dhe përfaqësimin e të gjitha subjekteve politike.
Çdo lojë tjetër do të ishte shkatërruese për vendin dhe ne mendojmë që është përgjegjësi jona që të negociojmë me të gjitha palët dhe institucionet që duhet të mundësojnë këtë dialog”, tha Mediu.
Ndërsa kreu i PBDNJ-së, Vangjel Dule, tha se ky takim do t’i shërbejë ndërgjegjësimit të mëtejshëm të faktorit ndërkombëtar lidhur me atë që ka ndodhur dhe po ndodh.
Dule shprehu vendosmërinë për të aktivizuar çdo qelizë me synim ndërgjegjësimin e qytetarëve dhe ndërkombëtarëve.
“Përvojat e së kaluarës duhet të na ndërgjegjësojnë”, tha Dule.
