“Astrit Patozin dhe partinë e tij Bindja Demokratikë e ka futur në lojë Sali Berisha”. Një tezë e pabesueshme kur e dëgjon, duke parë panoramën e zhvillimeve politike në vend, por që u tha këtë të enjte në sallën e parlamentit, madje më shumë se një herë.
I pari ishte kryetari i grupit parlamentar socialist Taulant Balla, i cili pasi u kujdes të mos sulmojë me fjalorin e rëndomtë Patozin dhe partinë e tij të re (ndryshe nga ç’bëri me opozitën), idenë e hedhur në parlament këtë të enjte e lëshoi në formë pyetjeje: Ku e dimë ne se s’është lojë e Berishës kjo e Astritit (Patozit)?
Pas Ballës, ishte shefi i tij politik Edi Rama, i cili e bëri fakt të kryer. “’Zgjedhje e lirë’, thotë Saliu, zgjedhje e lirë do të thotë Bindja Demokratike”, artikuloi Rama nga foltorja e Kuvendit.
Më tej, si për të shprehur dëshirën e sfumimit me ngut të bindjes së krijuar nga logjika e shëndoshë se partia e Patozit është pjellë e tij, shtoi: “Unë nuk kam asnjë lidhje me këtë pjesë”.
Kështu, edhe këtë herë, teknika e vjetër që për çdo “fajin e ka Saliu”, i shërbeu edhe njëherë kryeministrit Edi Rama për të tentuar të bindë shqiptarët se Asrit Patozi dhe Bindja Demokratike është pjellë e Sali Berishës.
Edhe këtë herë, duke përdorur këtë shprehje, tanimë të vjetër, tentoi t’ia lërë Salit në derë, Astritn…. /Boldnews.al/
