Një tjetër ngjarje kriminale është shënuar në Laç mbrëmjen e sotme. Mësohet se është djegur makina e shefit të personelit pranë ZRPP (Hipoteka) në Laç, Klevis Berhani.
Ngjarja ka ndodhur në lagjen nr. 3 të qytetit, teksa mjeti ka qenë i parkuar para banesës së Berhani. Burimet thanë se bëhet fjalë për një mjet tip “Ford Focus” ngjyrë blu, që dyshohet të jetë djegur qëllimisht. Dyshohet se automjetin e kanë lyer me benzine dhe me pas i kanë vënë flaken. Forcat e Policisë kanë shkuar në vendin e ngjarjes, ndërsa paraprakisht dyshohet se ngjarja ka ndodhur për shkak të detyrës së z. Berhani.
Ngjarja e rëndë duket se ka lidhje me atë që njihet si mafia e pronave, e cila ushtron presion nëse nga punonjësit e zyrave hipotekore nuk veprohet ashtu siç i kërkohet.
Klevis Berhami njihet si një prej punonjësve të ndershëm të zyrave të Hipotekës dhe nga burimet mësohet se ai nuk ka pranuar presionet e personave të tjerë, që dyshohet se kanë ndërmarrë aktin e djegies së automjetit, ndoshta si një paralajmërim.
Kjo ngjarje tregon edhe njëherë rënien e shtetit, përsa kohë zyrtarë të tij ndodhen nën presion dhe nën kërcënime për shkak të detyrave që kryejnë.
