Stevo Pendarovski dhe Gordana Siljanovska do të përballen në balotazhin e 5 majit për postin e Presidentit të Maqedonisë së Veriut.
Pas përfundimit të numërimit të votave, Pendarovski i mbështetur nga koalicioni qeveritar fitoi 323.846 vota ose 42.85%, i ndjekur me një diferencë të ngushtë votash nga Gordana Siljanovska e VMRO-DPMNE, e cila mori 319.240 vota ose 42.24%.
Kandidati shqiptar, Blerim Reka arriti që të merrte vetëm 79.915 vota ose 10.57 %.
Pendarovski në konferencën për shtyp tha se është i kënaqur nga procesi zgjedhor. Pendarovski falenderoi të gjithë nacionalitetet në vend duke theksuar se koncepti “bashkë përpara” duhet të vazhdojë dhe të triumfojë në raundin e dytë më 5 maj.
Ai mes tjerash tha se vendi 10 vitet e fundit fatkeqësisht nuk ka pasur një president dhe se po pret me padurim të marrë postin e presidentit për ta integruar sa më parë vendin në strukturat euroatlantike.
Kandidatja nga radhët e VMRO-DPMNE-së Gordana Siljaniovska-Davkova në konferencën për shtyp nga selia e partisë falemnderoi VMRO-në dhe koalicionit për mbështetjen dhe besimin. Siljanovska tha se beteja sapo ka filluar, ajo theksoi se nëse mblidhen edhe votat e kandidatit shqiptar Blerim Reka do të shihet se kundër kandidati Stevo Pendarovski, i cili është përkrahur nga qeveria, ka pësuar humbje të thellë prej 70.00 votave.
Përpara përfundimit të numërimit të votave, Blerim Reka bashkë me aleatët e tij, Ziadin Sela dhe Bilal Kasami në një deklaratë u shprehën të kënaqur për rezultatin e arritur.
