Shampanjë dhe lot gëzimi. Juventusi fiton titullin kampion për herën e 8 radhazi në Serie A.
Pas fitores me përmbysje 2-1 ndaj Fiorentinës, “Zonja e vjetër” me në krye Cristiano Ronaldon ka siguruar matematikisht titullin e 35-të në historinë e klubit.
Me këtë titull Juventusi gëzon tifozët bardhezi që kishin mbetur të zhgënjyer nga dështimi i mesjavës, kur u eliminuan nga Liga e Kampionëve, pas disfatës tronditëse kundër Ajaxit.
Fillimisht ishin miqtë që befasuan të gjithë duke shënuar golin e avantazhit në minutën e 6 me anë të Milenkovic.
8 minuta nga fundi i pjesës së parë ishte Alex Sandro i cili shënoi me kokë pas krosimit nga Pjanic.
Pjesa e parë përfundoi në barazim, ndërsa në fraksionin e dytë të lojës skuadra e Allegrit kalon në avantazh falë një shpërthimi në krah të Cristiano Ronaldos.
Portugezi detyroi mbrojtësin German Pezzella të shënojë autogol.
Me këtë fitore, Juventusi shkon në kuotën e 87 pikëve të mjaftueshëm sa për të siguruar Scudetton 5 javë para fundit të kampionatit.
