Jo vetëm që doli kundër vendimi të grupit parlamentar të PD-së për të mos djegur mandatin e deputetit, por merr detyrën e kryetares së deputetëve të rinj të PD-së në parlament.
Gjatë fjalës si kryetare e grupit në Kuvend, Rudina Hajdari është zotuar në foltore se grupi i ri i PD do të ndryshojë sistemin politik dhe do të mbështesë punën për Reformën Zgjedhore. Hajdari tha se grupi i ri është kundër ndryshimeve kushtetuese të vitit 2008.
“Do përfaqësojmë demokratët që duan të përfaqësohen nga ne në parlament. Do denoncojmë skandalet e qeverisë, do prezantojmë një alternativë për Shqipërinë e të nesërmes. E para Reforma Zgjedhore, dhe ndryshimin e sistemit. Do përpiqemi që ta ndryshojmë sistemin tonë të kalbur politik, dhe kakistokracisë. Na duhet një sistem politik më i denjë. Do mbështesim Reformën Zgjedhore. Ky grup parlamentar është kundër ndryshimeve kushtetuese të vitit 2008. Ato sollën degradimin e cilësisë së institucioneve. Do gjejmë çdo lloj mënyre dhe formule të përshtatshme, nga deputetë që janë të zgjedhur nga populli dhe kryetarët e tyre. Jemi të hapur për diskutim publik. Do shohim kush është sistemi më i pasur. Kjo është kauza jonë e vetme”, u shpreh ajo.
Në nisjen e seancës së sotme plenare janë zyrtarizuar edhe grupet e pavarura parlamentare të deputetëve që vijnë nga PD dhe LSI. Kreu i Kuvendit, Gramoz Ruçi bëri me dije se deputetët e rinj të PD-së do të kenë si kryetare grupi Rudina Hajdarin, ndërsa ata të Lëvizjes Socialiste për Integrim do të përfaqësohen nga Nimet Musai.
