Masa të ashpra kundër emigrantëve të përfshirë në veprimtari kriminale ka paralajmëruar ministri i Brendshëm Italian, Mateo Salvini.
Reagimi ka ardhur pas përplasjes me thika mes një shqiptari dhe dy nigerianëve, ngjarje që ka ndodhur në Ferrara.
“Sherri i disatë mes emigrantëve në Gad të Ferrarës, të therur me thika, mes një shqiptari dhe dy nigerianëve. Me 3 maj do të jem në qytet dhe gjatë orëve të ardhshme do të ftoj të gjithë prefektët për t’ju dhënë një urdhër për të përzënë të gjithë kriminelët nga qytetet. Aty ku nuk arrijnë kryebashkiakët, do të shkojmë ne”, ka paralajmëruar Salvini në një postim në rrjet.
Tre personat, dy nigerianë dhe një shqiptar, janë përleshur me thika mes tyre. Të tre personat kanë mbetur të plagosur në një nga lagjet kryesore të qytetit, ndërsa policia ka bërë të ditur se përleshja ka ndodhur për shkak të konflikit për kontrollin e territoreve të shpërndarjes së kokainës.
Ferrara është kthyer vitet e fundit në një nga kulmet e trekëndëshit të trafikimit të drogës Spanjë-Itali-Shqipëri, dhe pika kryesore e futjes nga Shqipëria e drogës të destinuar për zonën lindore dhe qendrore të veriut të Italisë.
Në Ferrara, në tetor 2017, policia italiane kapi dy tonë marijuanë të ardhur nga Shqipëria. Në të njëjtin muaj, policia kapi 120 kg të tjera drogë të ardhura nga Spanja me një maune, dhe arrestoi pesë trafikantë, përfshi dy shqiptarë.
