Kandidati i Aleancës Nacionale nga Partia Popullore Republikane (CHP), Ekrem Imamoglu, ka marrë zyrtarisht mandatin si kryetar i Bashkisë Metropolitane të Stambollit, qyteti më i madh i Turqisë.
Ai fitoi garën në zgjedhjet lokale kundër ish-kryeministrit turk nga partia e Rexhep Taip Erdogan, Binali Yildirim. Partia për Drejtësi dhe Zhvillim ka ankimuar rezultatin duke pretenduar parregullsi në zgjedhje.
Këshilli i Lartë Zgjedhor i Turqisë (YSK) ka vendosur që të vazhdojë shqyrtimin e ankimimit, por njëkohësisht i ka dhënë mandatin kandidatit të opozitës.
Imamoglu, 48 vjeç, iu dha certifikata e zgjedhjeve në Gjykatën Caglayan ku ndodhet Këshilli i Zgjedhjeve i Stambollit.
Imamoglu mori vulën e kryebashkiakut nga ish-kryebashkiaku Mevlut Uysal gjatë një ceremonie dorëzimi në ndërtesën e Bashkisë Metropolitane në Sarachane.
Sipas rezultateve zyrtare, Imamoglu fitoi zgjedhjet duke marrë 4,169,765 vota ndërsa ish-kryeministri i Turqisë dhe kandidati i Partisë AK, Binali Yildirim, 63-vjeç, morën 4,156,036 vota.
Yildirim tha se ishte “e qartë” se votat e tij ishin vjedhur gjatë zgjedhjeve të 31 marsit dhe kishin shkuar te Imamoglu.
