Letër e hapur
Më vjen keq që me këtë letër do t’u drejtohem të gjitha institucioneve ligjzbatuese dhe atyre të mbrojtjes së atyre grave që janë të pambrojtura dhe viktimë e krimit dhe dhunës në familje.
Deri sa do të vazhdojë mungesa e vëmendjes së institucioneve shtetërore si Policia e Shtetit, Zyrat e Shërbimit Social, në rastet e dhunës në familje???
Marr shkas nga rasti i fundit për ngjarjen e ndodhur në Zejmen Lezhë,
Shtetasia L. Dida, e keqtrajtuar dhe dhunuar nga bashkëshorti i saj, me urdhër mbrojtje të lëshuar nga Gjykata Lezhë, por të pa vënë në ekzekutim nga institucionet ligjzbatuese si Policia Shtetit dhe Zyra e Shërbimit Social Lezhë.
Pas marrjes së urdhrit të mbrojtjes rrihet barbarisht nga bashkeshorti i saj. Shtetasia L.Dida në datë 10.04.2019 ka paraqitur kërkesën për urdhër të menjëhershëm mbrojtje në Gjykatën e Rrethit Gjyqësor Lezhë ku gjykata ka vendosur … “I padituri të mos i afrohet paditëses L.Dida përtej një distance 50 m. 2. I padituri të mos cënojë, ngacmojë apo kontaktojë me paditësen Liza Doda. 3. I padituri të mos kërcënojë paditësen. 4. I padituri të mos kryejë vepër të dhunës në familje ndaj paditëses”, për një afat 12 muaj.
Sipas shpjegimeve para gjykatës, në momentin e urdhërit të mbrojtjes, paditësja ka deklaruar se ka rreth 10 vite me konflikte dhe mosmarrëveshje. Ka rreth më shumë se 3 vite që e ka nxjerrë në oborr të banesës. Këto veprime i bën në mënyrë që të largohej nga shtëpia.
E ka dhunuar disa herë edhe në sy të fëmijëve ku ka ushtruar dhunë edhe ndaj tyre. E ka lënë të flejë jashtë shtëpisë me netë të tëra. I është drejtuar policisë ku ka deklaruar se ky person edhe mund ta vrasi, por asnjë masë.
Sipas deklarimeve të znj.Dida në Gjykatë, nga punonjesit e policisë nuk është marrë asnjë masë në lidhje me ankesat e saj. Mosveprimi i tyre ka sjellë dëme të vazhdueshme në shëndetin e saj, ku ka përfundur edhe në gjendje kome për shkak të dhunës së ushtruar vite më parë.
Së fundmi, pasi Znj.Dida mori guximin dhe ju drejtua gjykatës, sapo ra në dijeni, dhunuesi (bashkëshorti i saj) të këtij vendimi gjyqësor, e masakroi bashkëshorten e vet duke e lënë në gjendje të rëndë shëndetësore.
Femrat ndihen të pambrojtura edhe me vendime gjykate. Policia, prokuroria, zyra sociale, nuk funksionojnë në këto raste, vendimet e gjykatës nuk zbatohen dhe nuk ekzekutohen. Praktikisht jam në një gjendje të pambrojtur de facto. Dhe si ankuesja janë shumë femra të tjera në Shqipëri.
Duhet të ndryshohet sistemi i mbrojtjes ndaj gjinisë më të dobët, të përkrahet e të promovohet në shoqëri, e jo të dhunohet sa herë të mundet si gjini më e dobët fizikisht. Ministria Manastirliu publikon shpesh lajme për mbrojtje për gratë viktima të dhunës, por cila është mbështetja sociale për këto raste në realitet? Asgjë, vetëm lajme dhe reklama televizive.
Fjalet e Ministres: “Sot një grua që denoncon dhunën është shumë më e mbrojtur, sepse me ndryshimet ligjore që miratuam në Kuvend, garantojnë urdhrin e menjëhershëm të mbrojtjes për gratë viktima të dhunës në 24 orët e para të denoncimit”…
Ne fakt Znj.Didi, e besoi dhe denoncoi dhunën në datën 10 prill 2019, “u mbrojt nga ndryshimet ligjore” dhe në datën 16 prill 2019, në mesnatë u gjend në gjendje të masakruar në Spitalin rajonal të Lezhës.
A mundet Ministrja të shpjegojë arsyen pse nuk u vu në zbatim urdhri i mbrojtjes dhe kush janë pergjegjësit e kësaj situate???
Mjafte më.
Rastet e dhunës në familje janë shndërruar në një fenomen shqetësues për shoqërinë tonë dhe institucionet duhet të mbajnë përgjegjësinë ligjore për zbatimin e ligjit, dhe jo të bëjnë lajme sa për reklamë të zgjidhjes së problemeve.
Bashkëlidhur do të publikojmë foto të znj.Dida për të ndihmuar ato gra të tjera që vuajnë dhunën në familje dhe ndergjegjësuar organizmat shteterore për zbatimin e ligjit.
Cfarë bëri Policia e Shtetit për zbatimin e Urdhrit të Mbrojtjes??? Asgjë.
Cfarë bëri Zyra e Shërbimit Social Lezhë për zbatimin e Urdhrit të Mbrojtjes??? Asgjë.
Cfarë bëri gjykata për dërgimin e vendimit të Urdhrit të Mbrojtjes në insitucionet e posaçme brenda 24 oreve??? Asgjë.
Institucionet ligjzbatuese këto, nuk munden në kohë të marrin masat. Çfarë mund të thotë znj.Ministre??? Mjaft më, mjaft vetëm me reklama pasi çdo ditë ka një numër të konsiderueshëm grashë të dhunuara, i zbatoni ato që keni shkruar e publikuar.
Ju faleminderit
Avokate Vasilika Hysi
