Nga Boldnews.al
Kur ka kaluar më shumë se një javë nga vjedhja spektakolare e rreth 10 milionë eurove në aeroportin e Rinasit, policia dhe prokuroria nuk kanë arritur të sigurojnë të dhënat për autorët e dyshuar.
Deri më tani, publikisht është përmendur vetëm emri i Admir Murataj, për të cilin pretendohet se u vra në një konflikt të armatosur me Policinë, menjëherë pas grabitjes. Gjithësesi, gjykata për Krime të Rënda kërkoi paraditen e së Martës nga Prokuroria që të vërtetojë se ai ka vdekur, për llogari të një procesi tjetër gjyqësor, ku Murataj akuzohet për 3 raste të tjera grabitjesh.
Në këtë moment hetimor, ku ende nuk është e qartë, Policia dhe Prokuroria duhet të ketë një numër të konsiderueshëm personash të dyshuar si të përfshirë. Hetimi, si rregull, duhet të shtrihet si tek ekzekutorët e grabitjes, po ashtu edhe tek të gjithë personat që kanë dijeni për transfertën e parave.
Lista e personave që kanë dijeni është disi e gjatë dhe nis nga titullarët e bankave, të cilët kanë nënshkruar operacionin e transferimit drejt Rinasit të parave që ranë pre e grabitjes.
Burime të “Boldnews.al” nga grupi hetimor konfirmuan se paratë e grabitura në Rinas, fillim-javën e kaluar, ishin të tre bankave të nivelit të dytë në Shqipëri; “Raiffeisen Bank”, ‘OTP” (ish-Societe General) dhe “Tirana Bank”
Dy bankat e para janë me kapital të huaj, ndërsa “Tirana Bank” është në pronësi të grupit financiar të drejtuar nga biznesmeni i fuqishëm shqiptar, Samir Mane.
Në bazë të informacioneve të siguruara nga “Boldnews.al” rezulton se, deri më tani, Policia dhe Prokuroria nuk ka marrë në pyetje asnjë prej drejtuesve të bankave, paratë e të cilave ranë pre e grabitjes së armatosur.
Grupi hetimor, për momentin, nuk e ka cilësuar të nevojshme të pyesë drejtuesit kryesorë të tre bankave për procedurat e ndjekura gjatë përgatitjes së ngarkesës me para, komunikimit me agjentët e Security e deri dorëzimi i parave tek personat përgjegjës për imbarkimin e thasëve në bordin e avionit.
Grabitja, e cila ngjan më shumë me skenarë filmash, duket se ka qenë e përgatitur deri në detaje të imtësishme. Komandoja e stërvitur për operacione të shpejta, armatime të të gjitha llojeve, por edhe efikasiteti i goditjes dëshmon se grabitësit kishin dijeni të plotë jo vetëm për transportin, por edhe për sasinë e madhe të parave që gjendeshin në ato thasë.
Këto detaje e ngushtojnë rrethin e personave që kishin dijeni, sidomos për sasinë e parave që gjendeshin në ato thasë. Dhe, një pjesë e këtyre personave, gjenden në personelin e bankave që kishin urdhëruar transportin e shumave monetare.
Gjithësesi, deri më tani, Policia dhe Prokuroria kanë përqëndruar hetimet e tyre në identifikimin e autorëve të grabitjes. Ndoshta, me identifikimin e tyre, do të punohet në drejtim të zbulimit të bashkëpunëtorëve të tyre të mundshëm, nëse ata kanë pasur të tillë.
