Konfliktet e vazhdueshme mes pushtetit vendor dhe institucioneve të ndryshme qofshin këto arsimore dhe jo vetëm, kanë sjellë një valë reagimesh në shoqërinë shqiptare. Prej kohësh thuajse i gjithë kryeqyteti është shndërruar në një kantjerë ndërtimi ku Bashkia e Tiranës është duke ndërhyrë në kompetencat e çdo institucioni për të arritur qëllimet e veta financiare.
Denoncimi i rradhës vjen nga Shoqëria Civile dhe Aleanca për Mbrojtjen e Teatrit. Kjo e fundit ka denoncuar fort shkarkimin e Rektorit të Universitetit të Tiranës duke akuzuar qeverinë për afera korruptive lidhur ngushtë me ndërtimin e shkollës 9-vjeçare në truallin e Universitetit Bujqësorë.
Përmes dokumetave ku shpjegojnë qartësisht dhe në mënyrë të detajaur të gjithë procesin e shkarkimit dhe emërimit të Rektorit, Aleanca Për Mbrojtje e Teatrit hedh dritë në shkeljen flagrante të ligjit mbi vendimin për shkarkimin e rektorit dhe ndërtimin e shkollës në ambjentet e një Universiteti.
Bashkia e Tiranës, duke ndjekur të njëjtën linjë siç ka vepruar me prishjen e Teatrit Kombëtar, me alibinë e ndërtimit të një shkolle ka shkelur ligjin duke përvetësuar truallin për interesa financiare.
Më poshtë denoncimi i Aleancës për Mbrojtjën e Teatrit
Një nga lajmet e rëndësishme të javës ka qenë shkarkimi i Rektorit të Universitetit të Tiranës nga Ministrja e Arsimit. Shkarkimi është qartësisht i paligjshëm. Ligji i miratuar nga vetë qeveria thotë se rektorët zgjidhen me votë, e shkarkohen vetëm për “shkelje të rënda” (pra për abuzime apo krime më të rënda). Konflikti në UT ka të bëjë me kompetencat e Rektorit dhe Administratorit (të zgjedhur nga Bordi, por praktikisht nga qeveria). E gjitha është një çështje që zgjidhet në gjykatë, e jo një “shkelje e rëndë”. Pra Ministrja është në thyerje të ligjit, por për aq kohë sa nuk ka gjykata, ashtu si në rastin e Teatrit, ajo vazhdon në rrugën e saj.
Por në këtë problem është vënë re edhe aktivizimi i Erion Veliajt, ashtu si në debatin me Rektorin e Universitetit Bujqësor. Megjithëse Rektori i UBT u tërhoq përballë shantazhit, publiku kuptoi se problemi nuk qëndronte thjesht në ndërtimin e një shkolle të re 9-vjecare, por te përdorimi i truallit përtej shkollës për një kompleks kullash.
Në thelb, debati me Rektorin e UT është i njëjti, e prandaj Erion Veliaj ka filluar të përfshihet në të. Prej kohësh qeveria po përpiqet të përdorë truallin sportiv të Qytetit Studenti për të ndërtuar “një kampus me koncesion” – pra, një kompleks kullash ku UT do përfitojë disa godina por shumica e truallit dhe fitimit i shkon kompanisë private. Bëhet fjalë për një hapësirë të konsiderueshme trualli publik, pranë Parkut të Liqenit dhe Unazës së Madhe, e vlefshme për klientët e qeverisë. Por deri tani, për arsye të paqarta, Rektori e ka refuzuar këtë plan.
Duke shfrytëzuar pseudo-debatin për universitetet, ku qeveria nuk ka përmbushur asnjë premtim, si dhe mungesën e gjykatave, Edi Rama dhe Erion Veliaj kanë vendosur të shkarkojnë në shkelje të ligjit Rektorin dhe ti hapin rrugë planit të tyre.
Është gjithmonë e njëjta skemë: kapet një truall publik, kërcënohen e shantazhohen personat e interesuar, përdoret mungesa e gjykatave për vendime anti-ligjore, me qëllim grabitjen e truallit për interesa të miqve të tyre. Njësoj si me Teatrin, Stadiumin, 7 Xhuxhat, Rama dhe Veliaj duan të grabisin edhe një truall tjetër publik!!!
