Ish deputetja dhe ish ministrja e Punëve të Jashtme e Partisë Socialiste, Arta Dade, në një intervistë për emisionin “Tempora” në Ora News, ka lëshuar sërish akuza të forta në drejtim të qeverisë dhe kryeministrit Edi Rama, duke deklaruari se segmente shumë të rëndësishme të shtetit nuk funksionojnë.
Dade theksoi gjithashtu se në vend është cënuar siguria në mënyrë serioze, ndërsa pushteti ekzekutiv është kapur nga korrupsioni.
“Nuk mendoj që kemi një kapje të shtetit në kuptimin klasik të fjalës, por është shqetësuese që ka segmente shumë të rëndësishme të shtetit që nuk po funksionojnë. Pra kam parasysh pushtetin gjyqësor, por mbi të gjitha Gjykata Kushtetuese që ka kohë që nuk funksionon. Kam parasysh edhe Parlamentin, i cili nuk punon në kapacitetin dhe në formatin e tij të zakontë me djegien e mandateve nga ana e opozitës që është një gjë e paprecedentë, që dëmton shuëm rëndë funksionimin e parlamentit, dëmton shumë rëndë demokracionë dhe dëmton shumë rëndë vetë opozitën. Kemi një sërë institucionesh që nuk po funksionojnë, është cënuar siguria në mënyrë serioze, në vend dhe unë besoj se segmente shumë të rëndësishme të shtetit, si ekzekutivi janë kapur nga korrupsioni. Kemi një rezultat të munguar në luftën kunër krimit të organizuar”, u shpreh Dade.
Senatorja e PS-së, edhe javë më parë, lëshoi akuza të forta në adresë të kryeministrit Edi Rama.
