Nga Boldnews.al
Teo Jacobs, vëzhguesi “rebel” i Operacioni Ndërkombëtar të Monitorimit, rezultoi një “tigër prej letre” përballë drejtueses së Prokurorisë për Krime të Rënda, Donika Prela.
Ai vendosi të bllokojë të gjithë shqisat e tij përballë shkeljeve flagrante në prokurores Prela, të faktuara me dokumenta zyrtare, fillimisht nga ‘Boldnews.al”, e në vijim nga kolegë të shumtë në media të tjera.
Z. Jacobs, por edhe kolegët e tij të Operacionit Ndërkombëtar të Monitorimit, vendosën të mbronin shefen e Krimeve të Rënda. Zonja Prela nuk justifikonte pasuritë e saj, nuk dha argumenta bindës se përse vetëm ajo kishte pasur “fat” në blerjen e 4 pronave me çmime shumë më të ulta se vlera e tregut. Donika Prela dhe bashkëshorti i saj nuk justifikonin lëvizje të shumta financiare, nën petkun e huamarrjeve.
Për të gjitha këto, Teo “i tmerrshëm” heshti! Vëzhguesi ndërkombëtar dhe kolegët e tij nuk e konsideruan aspak të nevojshëm rekomandimin për shkarkimin nga detyra të Donika Prelës. Për Z. Teo dhe të tjerët në ONM, seria e gjatë e problemeve të prokurores Prela me pasurinë dhe integritetin profesional ishin të “tolerueshme”.
Prokurori belg, z. Jacobs, ka spikatur në seancat dëgjimore që ka zhvilluar Komisioni i Pavarur i Kualifikimit, për debatet e shpeshta që ka zhvilluar me gjyqtarët e prokurorët. Në publik, ai perceptohet si njeriu që “godet fort” korrupsionin në sistemin e drejtësisë në Shqipëri.
Por, e vërteta duket se është shumë larg këtij perceptimi. Teo Jacobs do të mbahet mend vetëm për batuta dhe ironi shterpë. Produkti final është vetëm zhurmë dhe asgjë më shumë.
Rasti i Donika Prelës e nxori zbuluar “shterpësinë” e ironisë së tij. Ai shkëmbeu disa batuta me Prelën. Iu drejtua prokurores shqiptare se “ndjente një shije të hidhur në gojë” për mënyrën se si ajo dhe bashkëshorti i saj u ishin shmangur taksave.
Por, vetëm kaq! Teo qëndroi urtë kur kjo prokurore shqiptare, e cila është e bindur se do të drejtojë SPAK-un, shprehet publikisht dhe me arrogancë që “nuk jemi në Europë që të paguajmë taksat”.
Z. Jacobs dhe kolegët e tij të ONM-së gjenden në Shqipëri për të përafruar drejtësinë e vendit tonë me standartet e Bashkimit Europian. Të paktën kështu thuhet në letrat, në bazë të të cilave këta vëzhgues ndërkombëtarë po shijojnë “vakancat” shqiptare, me pagesa mijëra-euroshe në muaj.
Në Bashkimin Europian paguhen taksat deri në qindarkën e fundit. Edhe në Shqipëri, pjesa më e madhe e qytetarëve, ata që e njohin dhe e respektojnë shtetin, i paguajnë taksat. Nuk janë të gjithë si Donika Prela, e cila e konsideron normalitet “mos-pagimin e taksave”.
Z. Teo duket se nuk e ka kuptuar këtë gjë!
Donika Prela, gjithësesi, nuk i ka mbyllur ende llogaritë me Vetingun. Ajo do të duhet të japë sqarimet e saj para Kolegjit të Posaçëm të Apelimit, pas ankimit të Komisionerit Publik.
Ndërkohë, z. Teo e mbylli misionin e tij. Ai ka vetëm një zgjidhje për veten dhe qytetarët shqiptarë.
Të largohet nga Shqipëria. “GET OUT”, i nderuari, z. Jacobs!
