Ka një ping-pong midis qeverisë dhe konceisionarit për tia lënë përgjegjësinë njëri-tjetrit përsa i përket grabitjes së ndodhur dje në Rinas, ku u vodhën 10 milion euro.
Eksperti i Aviacionit Civil, Dritan Goxhaj tha për Ora News, se përgjegjësinë e kanë autoritetet shtetërore, posaçërisht Ministria e Transporteve.
“Në 2015 është bërë një auditim i hollësishëm në aeroportin e Rinasit dhe kanë dalë shkelje tepër serioze, siç është hyrja e mjeteve në zonat ristrikte të sigurisë, siç ndodhi me vjedhjen e fundit. Raporti i është dhënë Autoritetit të Aviacionit Civil dhe nuk ka marrë asnjë masë. Autoriteti ka dështuar në kryerjen e detyrave të veta. Përfaqësuesit e shtetit kanë kryer vepër penale të shpërdorimit të detyrës.”
Ndërsa ish-shefi i Emergjencave Civile, Shemsi Prençi tha se është në dijeni të një kontrolli të imtësishëm nga institucione ndërkombëtare të sigurisë ku janë dhënë edhe detyra për sigurimin e Aeroportit.
“Dominon tendenca për të larguar përgjegjësitë. Jam në dijeni të disa zhvillimeve që janë bërë vitet e fundit duke filluar nga 2015 ku Autoriteti i Aviacionit Civil dhe aeroporti i Rinasit i janë nënshtruar një kontrolli të imtësishëm nga institucione ndërkombëtare të sigurisë së raportit dhe ka një raport të hollësishëm ku janë dhënë detyra në mënyrë të përsëritur për sigurimin e aeroportit të Rinasit sidomos me hyrjen dhe daljen e makinave, si duhen shoqëruar dhe si duhen kryer veprimet. Që në 2005 kur i është dorëzuar nga policia e shtetit koncesionarit së bashku me ICTS është shkrirë reparti i sigurimit të jashtëm. Kemi propozuar herë pas here masa shtesë për aeroportin e Rinasit. Përgjegjësinë e ka vetë Ministria e Transporteve që duhet të përgjigjej se i kanë shkuar raporte të njëpasnjëshme, Ministria ka mbajtur lidhjet me koncesionarin. Përveç kësaj Ministri i Brendshëm për 4 vjet ka qenë kryetar i Bordit të Aviacionit Civil dhe asnjëherë nuk ka marrë në konsideratë propozimet që janë bërë. Kemi debatuar në mbledhje me koncesionarin dhe thoshte kush jeni ju se e kishte rregulluar me të tjerët, përfaqësuesit e lartë të shtetit.”, tha Prençi.
