Nga Boldnews.al
Policia e Tiranës arrestoi sot Altin Isaraj, 48 vjeç, i cili është vëllai i Arben Isaraj, një prej emrave dhe figurave të njohura në rradhët e Partisë Socialiste.
Arben Isaraj ka mbajtur funksione të rëndësishme nga ai i Inspektorit të Përgjithshëm të SHIK, këshilltar i Kryeministrit, zv.ministër drejtësie dhe dy herë deputet i PS-së.
Vëllai i Arben Isaraj, Altin Isaraj 48 vjeç, një emër i njohur për drejtësinë dhe policinë, u kap pasi qëlloi në ajër me armë zjarri nga makina me të cilën lëvizte. Isaraj ndodhej në arrest shtëpie, pasi më parë ishte arrestuar për shpërndarje lënde narkotike dhe trafikim të armëve dhe municioneve.
Altin Isaraj u arrestua në 20 tetor 2018, Gjykata e Tiranës vendosi masën e arrestit me burg, ndërsa vëllai i tij, Arben Isaraj dha dorëheqjen nga posti i Drejtorit të Përgjithshëm të Patentave, duke e lidhur këtë akt me arrestimin e të vëllait.
Por historia e vëllait problematik të Arben Isarajt, që ka mbajtur poste dhe funksione të rëndësishme gjatë qeverisjes së PS-së nis prej viteve ’90.
Në vitin 1995, ai është akuzuar bashkë me dy persona të tjerë, për ekzekutimin e Altin Çelmetës. Për këtë ngjarje, e cila ndodhi në një nga zonat qendrore të Tiranës, rruga “Mine Peza”, u akuzuan 3 persona, dy prej të cilëve u dënuan me burg, ndërsa Isaraj u shpall i pafajshëm. Ngjarja në atë kohë u trajtua si një sherr për motive banale, ndërsa veç viktimës, shkaktoi edhe dy të plagosur.
Nuk dihet rrethanat sesi Isaraj në atë kohë shpëtoi nga akuzat, pasi dy personat që u dënuan me burg e akuzuan për ngjarjen.
Në vitin 1999, në kulmin e debateve politike të kohës u tha se Altin Isaraj ishte pajisur me një raport mjeko ligjor për probleme mendore. Gjashtë vite më pas, kur PD erdhi në qeverisje, ish-ministri i Drejtësisë në atë kohë, Ilir Rusmali, hapi një debat kur kërkonte që personat që kishin probleme të tilla të mos liheshin të lirë, por t’i nënshtroheshin kurimeve mjekësore në qendrat spitalore.
Isaraj, veç problemeve me drejtësinë shqiptare, është arrestuar edhe në Greqi. Në nëntor të vitit 2011, Drejtori i Përgjithshmë i Policisë, Hysni Burgaj, konfirmoi për median se në Greqi është arrestuar vëllai i ish-deputetit socialist Arben Isaraj, Altin Isaraj. Arrestimi i tij erdhi pas goditjes së një organizate për trafik kokaine.
Më pas ai u rikthye në Shqipëri, ku sërisht ka pasur probleme me drejtësinë. Në zgjedhjet e 2017-ës ai u akuzua publikisht se ka ushtruar presione ne qarqet e Vlorës dhe Gjirokastrës ndaj votuesve. Në atë kohë Arben Isaraj mbante detyrën e zv.ministrit të Drejtësisë, ndërsa akuzat bëheshin nga drejtues të LSI-së. Sipas tyre, Altin Isaraj, bashkë me 4 persona të tjerë ushtronin presione ndaj votuesve në favor të Partisë Socialiste.
Ajo që bie në sy është fakti se pothuajse në çdo arrestim, Altin Isaraj është liruar ose i janë lehtësuar akuzat, sikundër ndodhi edhe herën e fundit kur masa e sigurisë së vendosur ndaj tij për lëndë narkotike dhe armë, ishte ajo e arrestit të shtëpisë.
