Debatet mes stafit akademik dhe autoriteteve të bashkisë lidhur me ndërtimin e një shkolle në zonën ku aktualisht përdoret si fidanishte për Fakultetin Bujqësor, janë shtuar gjithnjë e më shumë. Ditën e sotme në ambjentet e këtij fakulteti ka shkuar edhe nënkryetari i bashkisë, Arbër Mazniku për të sqaruar situatën. Por, prezanca e tij duket se e ka acaruar akoma më shumë situatën dhe debatet mes tij dhe pedagogët kaluan në ofendime dhe mallkime.
Debati i plotë:
Pedagogu: Ti po hoqe këta, hoqe universitetin. Ju po prekët universitetin e keni shkatërruar, unë mbroj interesin publik. Të kishit ardhur para 3 muajsh. Kur Rama doli unë e përgëzova. Duam të na ndihmoni, jo të na shkatërroni. A keni fëmijë? Votova për ju, që mu thaftë dora! A doni që fëmijët tuaj të ikin në emigracion? Ju ardhtë zoti dorën të gjithë atyrë që bëjnë këtë gjë?
Mazniku: Po për fëmijët e këtyre s’duhet të shqetësoheni, kjo është pyetja e drejtë? A kanë të drejtë banorët t’ju shkollohen fëmijët? Kjo zonë s’është më si para 20 vitesh. Tani qyteti ka ardhur këtej.
Pedagogu: Lëri këto sofizma me mua, po të dëgjoj për respekt, këto janë rrena. Mos na shkatërroni kampusin. Ju miku im po bëni një gabim shumë të madh.
Mazniku: Këtu është një djerrinë me plehra, s’ka as vresht asgjë.
Pedagogu: Këtu do e ndërtojmë vreshtin
Mazniku: Banorët e meritojnë shkollën.
Pedagogu: këto janë sofizma
Mazniku: Kështu ndodh në çdo vend të botës.
Debati mes tyre u zhvillua në një moment kur tensionet mes bashkisë Tiranë dhe rektoratit të UBT janë në kulmin e tyre.
Prej dy ditësh, studentët dhe pedagogët e UBT, janë ngritur në protest pasi në fidanishten e këtij universiteti, që përdoret nga studentët si laborator është vendosur nga bashkia Tiranë që të ndërtohet një shkollë.
