Kolegji i Posaçëm i Apelimit vendosi këtë të enjte shtyrjen e seancës gjyqësore për ankimin e Rovena e Gashit për shkarkimin e saj si prokurore nga Komisioni i Pavarur i Kualifikimit. Shkak u bë se Gashi kishte zgjedhur si avokate të motrën, Ema Gashi. Për shkak të mospranimit të palës mbrojtëse, seanca ndaj Rovena Gashit është shtyrë dhe do të zvhillohet më 23 prill.
Motra e Rovena Gashit, Ema Gashi ka dalë para gazetarëve në përfundim të seancës në KPA. “I hoqën të drejtën e mbrojtësit, unë që jam Ema Gashi, motra e subjektit Rovena Gashi, s’mund te legjitimohem si mbrojtëse. Po detyrohem të tregoj ligjin para kamerave, pa na kërkuar ne mendimin paraprak. Se denim që kjo do përbënte problem. KPA tha se neni 39 i Kodit të Procedurës të Administraturës, nuk gjen zbatim. Ligji thotë ndryshe. Subjektit ka të drejtë të mbrohet”, tha ajo.
DEBATET NË SEANCË
Nuk kanë munguar edhe debatet në seancë, ku avokatja Ema Gashi është shprehur pse nuk është Mia Roznig si përfaqësuese e OMN-së, por është Theo Jacobs.
Rovena Gashi: Do të asistohem në proces nga Ema Gashi.
Albana Shtylla: Është edhe e afërmja juaj?
Rovena Gashi: Po, është motra ime, gjyqtare në Durrës.
Ema Gashi: Jam gjyqtare në Durrës. Dhe vajza e babait tonë që i keni bërë Vetting prej një dekade pa qenë fare subjekt i ligjit. Me email na është thënë se përfaqësues do të jetë nga OMN-ja Mia Rozing. Po ashtu për arsye shëndetësore na është thënë se nuk është dot e pranishme sot për arsye shëndetësore. Në mënyrë të papritur këtu shohim së është Teo Jacobs. Ka ndonjë akt për zëvendësimin e përfaqësuesit të OMN-së në këtë proces? Në çfarë cilësie e zoti Teo Jacobs është këtu?
Teo Jacobs: Emri im nuk është Mia por Teo dhe këtu përfaqësoj OMN-në. Kolegia ime është e sëmurë në shtëpi dhe roli im është që të monitoroj dhe të ndjek këtë seancë.
Ema Gashi: E kuptuan që nuk paska një vendim të ONM-së për zëvendësimin e Mias me Teo Jacobs.
Kreu i trupës, Albana Shtylla: Do të doja të limitoheni në vijimin e diskutimit pas vendimmarrjes dhe kërkesës paraprake që paraqiti vëzhguesi.
Më 25 korrik të këtij viti, ish-drejtorja e Marrëdhënieve me Jashtë dhe Sektorit të Dekriminalizimit në Prokurorinë e Përgjithshme, e pezulluar muaj më parë nga kryeprokurorja Arta Marku, u shkarkua nga detyra. Sipas Komisionit të Pavarur të Kualifikimit, ish- prokurorja, Rovena Gashi nuk e justifikon pasurinë. Gashi nuk ishte e pranishme gjatë shpalljes së vendimit, duke mbajtur të njëjtin qëndrim si dhe në seancën dëgjimore me (20 korrik), ku refuzoi Komisionin me argumentin se vendimi për të dhe shumë të tjerë ishte i paracaktuar.
