Shoqata “Çamëria” ka reaguar për notën e protestës së qeverisë greke nga Shqipërisë dhe kërkesën në UEFA pas hapjes së banderolës që kujtonte gjenocidin mbi çamët në ndeshjen Shqipëri-Zvicër. Në një deklaratë për mediat, Alda Hasani, përfaqësuese e Shoqatë “Çamëria” sjell një rast flagrant ku tifozët grekë kanë shpalosur flamurin irredentisti për “Vorio Epirin” në ndeshjen me Malin e Zi, ndeshje e zhvilluar më 24 mars. “Dy rastet nuk janë të njëjta. Banderola në Francë, për një çështje humane, të një krahine gjeografike si Çamëria dhe ishte e vendosur tek tifozët zviceran, në ndeshje të organizuar nga UEFA dhe Franca”, thuhet në deklaratën e shoqatës “Çamëria”. Ndërkohë që publikohet edhe video nga ndeshja e Greqisë, ku në sekondën 42 shfaqet flamuri i 1914.
DEKLARATË E ALDA HASANIT, PËRFAQËSUESE E SHOQATË “ÇAMËRIA”:
Shoqata “Çamëria” ndjek me habi protestat e ndërmarra nga qeveria greke për banderolën e vendosur në ndeshjen Shqipëri-Zvicër për përkujtimin e genocidit ndaj shqiptarëve të Çamërisë, protesta të ndërmarra nga një shtet që irredentizmin e ka shfaqur haptazi në ndeshje ndërkombëtare. Në Stadiumin “Gjeorgjios Karaiskaqis”, Athinë, në ndeshjen miqësore midis Greqisë dhe Malit të Zi, më 24 Mars 2016, anëtarët e shoqatës ekstremiste “Autonomia e Vorio Epirit 1914”, shpalosën flamurin e aneksimit të jugut të Shqipërisë si njihet Autonomia e Vorio Epirit, sipas fotografive dhe videos bashkangjitur.
Këto dy ngjarje nuk janë të njëjta. Në rastin e parë kemi një banderolë për përkujtimin e një genocidi, në një krahinë gjeografike si Çamëria, në tribunat e tifozëve zviceranë, në një ndeshje ku organizatorë ishte UEFA dhe siguria garantohej nga qeveria franceze. Në rastin e dytë kemi të bëjmë me një flamur politik, të një zonë irredentiste si “Vorio-Epiri”, në një ndeshje ku organizatore ishte Federata Greke e Futbollit dhe siguria garantohej nga qeveria greke. Termi „Çamëri“ ka qenë ekzistent përherë edhe në dokumentet shtetërore greke, si një trevë gjeografike që është e ndarë në dy shtete. Ndërsa termi “Vorio Epir” është shpikur në vitin 1913 për të gjitha trevat e shtetit shqiptar që Greqia tentonte t’i aneksonte.
Për këtë arsye, i bëjmë thirrje qeverisë së Republikës së Shqipërisë dhe Federatës Shqiptare të Futbollit të ndjekë hapa më të forta për ndëshkimin dhe përjashtimin nga garat ndërkombëtare të organizatorëve të ndeshjes Greqi-Mali i Zi për përhapje të tendencave irredentiste dhe mosgarantim të sigurisë. Ministria e Jashtme le të veprojë me reciprocitet: konsulli shqiptar në Gjenevë të protestojë pranë UEFA-s dhe personalisht ministri Bushati të dorëzojë notë proteste ndaj qeverisë greke për këtë akt të paprecedentë. Në këto 25 vjet, Ministria jonë e Jashtme është kthyer në një zyrë pranimi notash proteste nga fqinjët, me qindra nota proteste të drejtuara ndaj nesh nga Greqia dhe Serbia dhe asnjë notë proteste të drejtuar nga ne drejt tyre. Është rasti që në këtë shkelje flagrante të veprojë menjëherë.
Po ashtu, shoqata Çamëria i bën thirrje Federatës Shqiptare të Futbollit të kërkojë ndëshkimin maksimal të organizatorëve të ndeshjes Greqi-Mal i Zi, me përjashtimin e përfaqësueses greke nga ndeshjet ndërkombëtare. Sikurse, FSHF duhet të dalë në mbrojtje të tifozëve të Zvicrës, Federatës Franceze të Futbollit dhe qeverisë franceze për një akt normal, si banderola e vendosur për të drejtat e shqiptarëve të Çamërisë, një krahinë gjeografike joirredentiste, në ndeshjen Shqipëri-Zvicër.
