Zbardhen të tjera detaje nga grabitja me dhunë e kanbistit Agron Shira, javën e kaluar në zonën e 9 –katësheve në Tiranë.
Një prej të arrestuarve, 35-vjeçari Elvis Tafa, në dëshminë e tij, ka zbardhur skemën që kanë përdorur grabitësit.
Tafa u arrestua në kushtet e flagrancës nga një punonjës i policisë rrugore, ndërsa bashkëpunëtorët e tij u ndaluan disa orë më pas nga policia.
35-vjeçari ka pohuar para oficerëve të policisë gjyqësore se grabitjen e ka realizuar në bashkëpunim me Xhoni Didon.
“Te premten dola nga shtëpia në 05:00 dhe shkova takova Xhoni Didon tek ‘Kthesa e Kamzës. Atje kemi ndërruar rrobat dhe përmes një motori të Xhonit kemi shkuar tek 9-kateshet.
Disa ditë më parë Xhoni me kishte treguar për vendin dhe personin që do të grabisnim. Kur mbërritëm tek vendi kemi ndaluar motorin dhe kemi bërë sikur po i rregullonim gomën.
Pas 20 minutash, aty po kalonte kambisti me motor. Xhoni i ra me levë dhe ai ra nga motori.
Pasi i mori lekët hipëm në motor, ku i jepja unë dhe u drejtuam nga rruga e Barrikadave.
Tek kryqëzimi pashe një makine policie dhe desha të devijoj, por Xhoni më tha të ecja drejt.
Meqë nuk iu binda ai me qëlloi me levë dhe kam humbur ekuilibrin duke rënë nga motori. Ai u largua me lekët.
Për të kryer vjedhjen na kanë shtyrë Elvis Berisha dhe Blenard Hoxha, te cilëve u kishim boxhe”, mbyllet dëshmia e 35-vjeçarit.
Gjykata vendosi të premten arrest me burg për autorët e grabitjes.
