Ish-presidenti i FIFA-s, Sepp Blatter, thotë se shorti i disa kompeticioneve europiane ka qenë i fiksuar, duke përdorur “gogla të nxehta dhe të ftohta”.
Blatter, i cili është pezulluar për 6 vite nga futbolli, pas një hetimi që iu bë atij dhe drejtuesve të FIFA-s, çka prodhoi korrupsionin gjatë qëndrimit të tij në këtë trupë qeverisëse të futbollit botëror, insiston se kjo skemë manipuluese e hedhjes së shortit nuk është përdorur në asnjë garë në nivel botëror. Në një intervistë të dhënë për një gazetë argjentinase, Blatter pohoi mashtrimin me hedhjen e shortit “në nivel evropian”, por nuk dha hollësira.
Kurrë nuk i kam prekur goglat e shortit, – tha ai për “La Nacion”. – Sigurisht, ju duhet të ruheni nga ato, të ngrohta apo të ftohta qofshin. Unë jam dëshmitar se kjo gjë ka ndodhur në nivel europian, por kurrë në FIFA. Sigurisht, kjo gjë mund të bëhet. Ju i vendosni goglat në frigorifer më parë. Vetëm duke krahasuar njërën gogël nga të tjerat, kur ju i prekni ato, mund të kuptoni cila është e ftohtë nga të ngrohtat. Kur i prekni ato, e dini se çfarë kanë brenda ato.”
I pyetur në lidhje me hetimin e korrupsionit nga ana e hetuesve zviceranë dhe amerikanë, ai tha: “Blatter nuk është i korruptuar. Ata u përpoqën për të gjetur diçka për mua, por nuk do të gjejnë asnjë provë të shkeljes së ndonjë ligji zviceran. FIFA nuk është e korruptuar. Një organizatë nuk mund të jetë e korruptuar. Vetëm njerëzit janë të tillë.”
