Interes i ulët, Dejvi Bregu që pritet si hero dhe polemikat e Vangjelit me arbitrin. “Panorama Sport” ju sjell të gjitha pikantet e ndeshjes së djeshme, që u fitua nga gjirokastritët vetëm në fund.
* Skënderbeu braktiset nga drejtuesit në transfertën ndaj Luftëtarit. Presidenti Ardjan Takaj dhe zv.presidenti Arlind Boshku nuk ishin të pranishëm në stadiumin “Gjirokastra”. Në tribunën VIP, nga drejtuesit e klubeve ishte vetëm presidenti i Luftëtarit, Grigor Tavo, i shoqëruar nga disa miq të tij.
* Dejvi Bregu duartrokitet gjatë nga publiku pas futjes në fushë, ndërsa menjëherë pas ndeshjes ndan me një pjesë të lojtarëve të Luftëtarit kafen si ish.
* Me një minutë heshtje për nder të legjendës bardheblu, Ali Mema, ka nisur sfida Luftëtari-Skënderbeu.
* Të gjithë lojtarët dhe gjyqtarët kishin të shkruar në fytyrë mesazhin: “Me Ty”. Bëhet fjalë për nismën e FSHF-së kundër dhunës ndaj grave.
* Të parët që zbritën në fushë për të bërë nxehjen e zakonshme ishin bluzinjtë e Luftëtarit nën drejtimin e ndihmësit të Ahmatajt, Neritan Novi. Pak minuta më vonë janë korçarët, të cilët duartrokiten nga tifozët bluzinj, sa herë që Dejvi Bregu prekte topin.
* Edhe pse forcat policore nuk ishin të pranishme në stadium, në hyrje tifozëve u është ndaluar rreptësisht futja me shishe plastike të mbyllur.
* Temperaturat e larta u kanë ardhur në ndihmë një pjese të mirë të tifozërisë gjirokastrite për të kursyer xhepat, pasi e kanë ndjekur ndeshjen nga kodrat rreth stadiumit. Në pjesën veriore, pikërisht në kodrën pranë konviktit të vajzave që studiojnë në universitetin “Eqerem Çabej”, kishte mbi 200 tifozë. Në tërësi, stadiumi nuk pati më tepër se 1 mijë të pranishëm, një shifër e ulët kjo për një takim të tillë.
* Mesfushori Donaldo Rrapo ishte planifikuar titullar dje nga trajneri Julian Ahmataj, por duke u gdhirë e shtunë ai pati një gjendje gripale, shoqëruar me temperaturë të lartë. Kjo bëri që të mungojë.
* Në minutën e 17-të ka kohë për një replikë mes kapitenit të Skënderbeut, Kristi Vangjeli, dhe arbitrit kryesor, Kreshnik Cjapi. “Ke shumë ndeshje që po na bie më qafë, kujdes”, mësohet t’i ketë thënë korçari gjyqtarit kryesor.
* Mesfushori Gjergji Muzaka u udhëzua disa herë nga trajneri Shehi gjatë ndeshjes. “Mos rri pasiv, shko përpara se s’ka njeri në sulm”, i thoshte shpesh kreu i pankinës lojtarit “veteran”.
* Në minutën e 25-të, kur topi ishte jashtë vijave kufizuese, Aleksi bën përkthyesin mes trajnerit Julian Ahamtaj dhe mbrojtësit grek të Luftëtarit, Dimitri Koconis. Shpesh elbasanasi i pankinës së Luftëtarit i tërhiqte vëmendjen mesfushorit të krahut, Fili.
* Ahamtaj feston si i çmendur në momentin e golit të realizuar nga Dunga. Me dorën e majtë ai lëshon fort bidonin e ujit që konsumonte, ndërsa nuk kursehet as me fjalorin, duke shfryrë pas golit.
* Kokulur dhe me pica në dorë. Pas ndeshjes, lojtarët e Skënderbeut konsumuan në ambientet e stadiumit pica e më pas u larguan.
/Panorama Sport/
