Marko Radas nuk ishte i grumbulluar dje për transfertën ndaj Luftëtarit, duke hapur një gropë në qendër të mbrojtjes. Nuk bëhet fjalë për ndonjë dëmtim, por kapiteni i Skënderbeut, që pas ndeshjes së fituar me Kukësin ka kërkuar me insistim të paguhet.
Ai ka vënë kusht se nëse diçka e tillë nuk ndodh, nuk do të kthehej nga Kroacia pas pauzës së kampionatit. Gazeta kontaktoi me kapitenin e korçarëve të shtunën, por ai hodhi poshtë çështjen e financave.
“Unë për momentin jam në Kroaci, nuk ka lidhje situata ime me klubin. Ka qenë një personale me familjen, prandaj dhe u largova drejt Kroacisë”, deklaroi fillimisht Radas. I pyetur se cilat janë raportet e tij me presidentin Ardjan Takaj dhe nëse ka pasur së fundmi ndonjë përplasje, kroati u shpreh: “Unë me presidentin kam qenë shumë korrekt. Marrëveshja që kam bërë me të deri tani është normale. Besoj se javën tjetër do të rikthehem në Korçë”.
TRAJNERI – Pas ndeshjes së djeshme në Gjirokastër, ku Skënderbeu humbi me shifrat minimale 1-0, për mungesën e kapitenit Marko Radas u pyet edhe trajneri Orges Shehi. “Marko ndodhet në Kroaci. Pas ndeshjes me Kukësin ai është pranë familjes dhe mesa di, me lejen e drejtuesve të klubit. Besoj se ka ndonjë arsye familjare që ndodhet aty. Në Gjirokastër na mungoi edhe Sibo, i cili u dëmtua ditën e fundit. Kemi vështirësi kur mungojnë lojtarë të tillë”.
SITUATA – Mbetet për t’u parë se si do të rrjedhin ngjarjet, në një kohë që Skënderbeu si ekip, por natyrisht kapiteni Radas, po kalojnë një sezon me ulje-ngritje, ku oshilacionet nga fundi i fazës së dytë dhe deri më tani kanë qenë të frikshme. Gjithsesi, në Korçë kanë mohuar gjithnjë se klubi ka probleme financiare. Madje, së fundmi ka pasur edhe një sinjal të mirë nga KAS-i. Ndoshta deri më 16 prill, kur dhe pritet të mbahet seanca dëgjimore në Lozanë për dënimin që UEFA ka dhënë për Skënderbeun, shumë gjëra do të jenë qartësuar për klubin. Drejtuesit e kanë theksuar se duan minimalisht Kupat e Europës, por për të hapur dritën jeshile duhet që KAS-i të hedhë poshtë dënimin e UEFA-s, që ishte ekzemplar me 10 vite përjashtim dhe 1 milion euro gjobë.
/Panorama Sport/
