Në një nga 9 bisedat e përgjuara, zhvilluar mes Alfred Alizotit dhe Drejtorit të Policisë-Fier, Albert Nushi, përveç emrit të koduar “Shefi madh”, që është Fatmir Xhafaj, del edhe emri “Gramoz”, që sipas Alizotit, dukej se me delegim të “shefit të madh”, kishtë urdhëruar gjithë Policinë dhe Prokurorinë e Shtetit, për t’i hequr “njollën” trafikantit Agron-Geron Xhafaj.
Dëshmitari i prenotuar Alizoti, i deklaroi drejtorit Nushi, se me urdhër të “shefit të madh (Fatmir Xhafajt), zgjidhjen e çështjes (Geronit), e kishte marrë në dorë Gramozi dhe do ta mbyllnin pa kthim mbrapa.
Po cili është Gramozi, me të cilin mban lidhje kaq të afërta e konspirative Fatmir Xhafaj, ish-Ministër i Drejtësisë, ish-Ministër i Brendshëm, ish-Kryetar i Komisonit të Ligjeve, Kryetar i Reformës në Drejtësi bashkë me Etlida Gjonajn dhe aktualisht, deputet e anëtar i Komisionit Parlamentar të Ligjeve?
Përse pas këtij përgjimi, nuk flet kryeministri Rama, që një deputet i partisë së tij, futet në batak krimi dhe përse po hesht, Ministri i Brendshëm “i ndershëm”, Sandër Lleshaj (Lleshi), kur dëgjon që vartësi i tij drejtor policie qarku, financon një personazh krimi dhe i qëndron si zvarranik?
Meqë Fatmir Xhafaj, thotë se nuk e di, cili është “shefi i madh” dhe cili është Gramozi, që permenden në bisedë, po ia kujton “PAMFLETI”, nëpërmjet një dokumenti, shkresor, vendim zyrtar nga drejtësia shqiptare e ajo italiane, ku rezulton, se Gramozi, është “vëlla ideali e halli” me Agron-Geron Xhafajn, që kanë bërë të njëjtin “aktivitet” në Itali e Shqipëri dhe kanë ndarë të njëjtin fat të përbashkët me drejtësinë.
Sipas dosjes penale të Leçes e Kasacionit në Itali, sipas vendimeve penale të Gjykatave të Faktit e Apelit në Vlorë dhe Kolegjit Penal të Gjykatës së Lartë të Shqipërisë, rezulton se Gramozi që është ngarkuar nga Fatmir Xhafaj e Ardi Veliu, për të pastruar “Njollën Babale” të Agron-Geron Xhafës, është Gramos Murat Murataj, nga Vlora.
Bashkë me Agron Xhafën, me vëllain e tij Besnik Murataj dhe me 13 shqiptarë, italianë spanjollë e venezuelianë, janë arrestuar në grup në Itali, janë gjykuar në të njëjtën ditë e në të njëjtën gjykatë në Leçe dhe janë dënuar për të njëjtin krim të përbashskët: “Trafikim lëndësh narkotike”, me Vendim nr.455/2004, datë 21.04.2004 të Gjykatës së Apelit Leçe, i cili ka hyrë në fuqi më 10.12.2008, ndërsa urdhëri i burgosjes është lëshuar në datën 07.02.2009, nga Prokuroria e Përgjithshme, pranë Gjykatës së Apelit Leçe, Itali.
Mirëpo bashkë me Agron-Geron Xhafajn, i shpëtuan burgosjes në Itali dhe u rikthuen në Vlorë, ku hapën katër lloje biznesesh: 5 zyra këmbimi valutor, 8 “Bar kafe”, një linjë shëtitjes moto-detare plazhi, një biznes shezlone dhe biznesin e lojërave të bixhozit, me firmën “ITGSA”, me aktivitet 2178 pika bastesh në gjithë Shqipërinë, me logot “Ecobet”.
Madje, u përfshinë edhe në skandalin e trukimit të ndeshjeve, zbuluar nga “EUFA”, duke qarkulluar miliona, me llogari me emra fals, nëpërmjet bankës, që është me qira në ndërtesën pronë e “shefit të madh” Fatmir Xhafaj, në Vlorë.
Ndërsa dy “vëllezërit” trafikantë droge e ortakë biznesesh, Geron e Gramoz, që i kishin shpëtuar burgosjes në Itali, punojnë të qetë në Vlorë, policia shqiptare e Agron Kuliçajt që i kërkonte për ekstradim, arrestoi vetëm Gramoz Murataj, ndërsa Agron Xhafaj “shpëtoi”, sepse kishte ndryshuar emrin në “Geron”.
Me Vendimin nr.271, datë 13.06.2013 të Gjykatës së Faktit Vlorë dhe me Vendimin nr.70, datë 09.07.2013 të Gjykjatës së Apelit Vlorë, Gramoz Murataj, duhej të ekstradohej në Itali për të vuajtur dënimin, por miqtë e Fatmir Xhafës, të votuar edhe prej tij, si anëtarë në Gjykatën e Lartë, Edmond Islamaj, Guxim Zenelaj, Shkëlzen Selimi, Artan Zeneli e Tom Ndreca të fshirë nga “Veting”-u, me Vendim Nr.00-2014-237 të Kolegji Penal, nuk lejuan ekstradimin e Gramozit në Itali e kështu, qëndruan bashkë me Geronin në Vlorë, si biznesmenë të lirë./Pamfleti
