Barcelona kërkon lojtarët më të mirë të botës, por edhe disa prej tyre ëndërrojnë të luajnë me këtë skuadër. Një prej tyre është Antoine Griezman. Nuk është sekret që klubi “blaugrana” dhe sulmuesi francez janë afruar shpesh herë gjatë viteve të fundit, por tani marrëveshja pret vetëm konfirmimin në merkaton e verës. E sigurt për këtë është “El Mundo Deportivo”, e përditëshmja katalunjase shumë pranë Barcelonës.
Në numrin e së enjtes, kjo gazetë ka në faqen e parë francezin, ndërsa shoqëron foton e kampionit të botës me titullin “Bomba Griezman”. Duke qëndruar në atë që raporton e përditëshmja, sulmuesi i Atletico Madrid dëshiron të luajë me skuadrën katalunjase dhe është gati të ulë ndjeshëm përfitimet e tij financiare. Aktualisht, futbollisti fiton 23 milion euro në sezon, ndërsa pranon të zbresë deri në 16 milion euro në sezon, shifër kjo e dakordësuar një vit më parë, kur palët ishin shumë pranë marrëveshjes.
Kjo lëvizje e Griezman lidhet ngushtë me zhgënjimin e tij pas eliminimit në 1/8 e Ligës së Kampioneve. Megjithëse Atletico Madridit kishte në dorë kualifikimin për në çerekfinale, skuadra e Diego Simeones dështoi me humbjen 3-0 në fushën e Juventusit. Sulmuesi francez nuk e ka pritur aspak mirë këtë eliminim dhe kërkon të kalojë te Barcelona, ku në krah të Lionel Mesit ka më shumë mundësi të fitojë trofeun e Champions.
