Policia ka ndërhyrë në një konflikt mes përmbaruesve dhe familjarëve të një banese në zonën pranë 9-katësheve në Tiranë, pasi nuk ka shlyer kredinë në një bankë të nivelit të dytë.
Familja Tajari kishte marrë kredinë për ngritjen e një ferme në lushnje, ndërsa kishte lënë si kolateral apartamentin në fjalë.
Në kushtet e mos shlyerjes së kredisë, banka ka kërkuar sekuestrimin e apartamentit.
Rreth një muaj më parë, një prej pjesëtarëve të familjes, kërcënonte me vetëvrasje, ndërsa kishte hipur në parvazin e dritares.
Tensionet e krijuara në atë kohë bënë që përmbaruesit të tërhiqeshin, ndërsa kanë ndërhyrë sot për zbatimin e vendimit.
Familjarët janë ngujuar në banesë dhe kanë kërcënuar se do të digjen me benzinë.
Djali i familjes tregoi se ‘babanë e kanë marrë në komisariat dhe shefi i thoshte liroje shtëpinë se ta jap unë prapë.
“Sot nuk të lejohet më, do hyhet me dhunë. Kanë ardhur me zjarrfikëse dhe vijnë bëjnë presion; mbajnë dikë nga familja në komisariat. Vlera e shtëpisë është 130 milionë, ata e kanë shitur shtëpinë për 50 milionë. Unë do të mundohem ta mbroj, ta djeg, t’i hedh benzinë dhe atyre nuk do t’ua lë”, tregon djali.
