Krahas kondomit dhe vazektomisë -një ndërhyrje e vogël kirurgjike që ka për qëllim bllokimin e prodhimit të spermës tek meshkujt, së fundmi është zbuluar një tabletë shumë e thjesht për tu përdorur. Kjo tabletë përmban një lloj të hormoneve që ndalon prodhimin e spermës, mirëpo doktorët thonë se lansimi saj në treg mund të zgjasë deri në një dekadë.
Përderisa tableta që parandalon shtatzëninë tek femrat është zbuluar 50 vite më parë, pse po merr kaq shumë kohë krijimi i një tablete që do të ketë të njëjtin efekt tek meshkujt? Disa thonë se arsyeja është që mjekët kurrë nuk janë fokusuar në gjetjen e një tablete për meshkuj për arsye se kanë ekzistuar mënyra të tjera.
Sipas një hulumtimi të bërë në vitin 2011 nga Universiteti Anglia Ruskin, në mesin e 134 grave, 70 prej tyre nuk do të ishin të sigurta dhe nuk do të mbështeteshin në këtë tabletë, për arsye se ato pretendojnë që meshkujt nuk janë të vëmendshëm ndaj këtyre gjërave dhe do të harronin ta aplikonin.
Gjatë krijimit të kësaj tablete doktorët janë fokusuar, që të mos ketë efekte në zvogëlimin e hormoneve përgjegjëse për ereksion apo dëshirës për marrëdhënie seksuale.
Në meshkujt fertilë, qelizat e reja spermatike prodhohen në testikuj, dhe ndikohen nga hormone përkatëse. Problemi kryesor është bllokimi i prodhimit të këtyre qelizave pa e zvogëluar sasinë e hormoneve mashkullore. Në zbulimin e fundit mendohet se ky qëllim është arritur.
Në testimit e kësaj tablete kanë marrë pjesë 40 meshkuj, të cilët janë testuar për 28 ditë. Aty janë vërejtur vetëm disa efekte anësore të vogla dhe pas eksperimentit sasia e hormoneve mashkullore nuk është zvogëluar. Vetëm pesë prej këtyre meshkujve kanë përjetuar ulje të nevojës për marrëdhënie, dhe dy prej tyre kanë përjetuar simptoma të lehta të jofunksionimit erektil. Të gjithë këta meshkuj pohuan se nëse kjo tabletë do të ishte në treg do të vazhdonin ta aplikonin.
“Rezultatet tona sugjerojnë se kjo tabletë, që është kombinim i dy hormoneve që veprojnë si një tërësi, do ta ulë prodhimin e spermës mirëpo nuk do ta ulë dëshirën për marrëdhënie seksuale”, tha Dr. Christina Wang, një ndër pjesëmarrësit e këtij hulumtimi.
Përpos kësaj tablete, Dr. Wang dhe kolegët e saj kanë arritur të krijnë një xhel i cili pritet t’i nënshtrohet eksperimenteve në njerëz. Përdoruesit do të kenë mundësi ta aplikojnë këtë xhel në shpinë dhe në krahë ku do të absorbohet me anë të lëkurës. Ky xhel përmban hormonin progestinë, i cili bllokon prodhimin e testosteronit dhe rrjedhimisht zvogëlon prodhimin e spermës.
Kjo tabletë dhe ky xhel sigurojnë që hormonet përbërëse nuk do të ndikojnë as në çrregullimet e disponimit siç bëjnë shumica e hormoneve që merren si suplemente. Për meshkujt të cilët nuk preferojnë të marrin hormone për shkak se janë të ndjeshëm ndaj tyre, ky hap do të jetë zgjidhja e duhur.
Sipas Allan Pacey, profesor i andrologjisë ne Universitetin Sheffiels, tentativa për të krijuar një tabletë që do të kishe efekt të menjëhershëm deri tani ka dështuar, mirëpo studimi i fundit është një hap i mirë dhe shumë premtues në këtë drejtim.
