Ekipi i përfaqësueses gjermane do ta fillojë Euro 2016 pa probleme.”Nuk jemi të shqetësuar,” thotë trajneri Joachim Low ditën e shtunë në Lille pas seancës së fundit stërvitore në prag të ndeshjes me Ukrainën në stadiumin “Stade Pierre Mauroy”. “Mezi po pres që të fillojë turneu edhe për ne.” Trajneri nuk jep akoma të dhëna mbi formacionin, por siguron se Schweinsteiger do të jetë sërish lideri i ekipit, “e di që do të përmirësohet me kalimin e ndeshjeve”.
Low, ndërkohë shpreson në rikthimin e qendërmbrojtësit Mats Hummels në ndeshjen e dytë të turneut e cila do të zhvillohet të enjten kundër Polonisë “Individualisht ai është 100%. Ai do të hyjë në ndeshjet e ardhshme në planet tona nëse progresi i tij vazhdon me këto ritme.” Pritshmëri të mëdha Low ka për fantazistin Mesut Ozil, mbi të cilin ka thënë vetëm fjalë të mira. “Ai është në një formë fantastike.” Low mendon se lojtari ka teknikën e duhur për t’i dhuruar suksesin e radhës kombëtares së tij. Ai dhe Muller, të cilin Low e cilëson si “një lojtar vendimtar”, kanë peshën më të madhe në ekipin gjerman.
