Kërkimet për shqiptarin Ali Qazimaj, i cili dyshohet se ka vrarë një 75-vjeçar britanik dhe ka gisht në zhdukjen e gruan së moshuar të së ndjerit, vazhdojnë ende dhe kanë marrë një rrjedhë tjetër.
42-vjeçari Qazimaj që ka përfituar pasaportë britanike me identitet fals, është larguar nga Britania e Madhe dhe fshihet në një shtet europian.
“The Mirror” shkruan se policia angleze ka gjetur një copë letre ku ishte shënuar një numër celulari shqiptar që dyshohet se ka lidhje me Ali Qazimajn. Kjo copë letre kishte detaje edhe për një pjesë toke që është në shitje pranë aeroportit të Rinasit, shkruan SYRI.net.
I dërguari i ‘The Mirror’ në Tiranë konfirmon se kjo letër me numrin e celularit dhe të dhënat e tjera i është dërguar Policisë Shqiptare nga Policia Britanike.
Një zyrtar i lartë i Policisë Shqiptare i tha ‘The Mirror’ se do të bëjnë çdo gjë për hetimin dhe do të ndihmojnë sa më shumë të munden Policinë Britanike. “Ne besojmë fuqimisht që ky njeri nuk është nga Kosova, por nga Shqipëria dhe ka lidhje këtu”, tha zyrtari i Policisë Shqiptare.
Gazeta britanike shkruan gjithashtu se Ali Qazimaj kishte udhëtuar për në Shqipëri në vitin 2013 duke përdorur pasaportën britanike që e ka përfituar me azil duke pretenduar se ishte refugjat nga lufta e Kosovës.
Ali Qazimaj, i njohur ndryshe edhe si Marco Costa, mendohet që të ketë lidhje kriminale në vendin tonë, ndërkohë letra me shënime e gjetur në Angli dhe që iu është dorëzuar autoriteteve shqiptare, deri tani është e vetmja shpresë për të zbuluar krimin nëse në të gjenden gjurmë të 42-vjeçarit shqiptar.
