Partia Socialiste mbledh më datën 23 mars Kongresin e saj, ku pritet ndër të tjera të përcaktohen edhe kandidatët e kësaj force politike për kryebashkiakë.
Referuar agjendës zyrtare, të publikuar nga Boldnews, bie në sy që në seancën e parë të punimeve të Kongresit, është edhe sesioni ‘Bashkia që duam’, ku të pranishmëve do t’i drejtohen kryebashkiakët që rikonfirmohen dhe kandidatët që pritet të synojnë drejtimin e bashkive.
Kështu Armando Subashi, Sotiraq Filo, Dritan Leli dhe Majlinda Bufi, rikonfirmohen si kryebashkiakë përkatësisht në bashkitë e Fierit, Korçës, Vlorës dhe Roskovecit. Ndërsa Pjerin Ndreu dhe Gledian Llatja, pritet të garojnë për bashkitë e Lezhës dhe Elbasanit. Ndreu do të lërë mandatin e deputetit, ndërsa Llatja mban detyrën e Prefektit të Qarkut Elbasan, duke synuar kështu pozicionin që prej disa mandatesh mbahet nga Qazim Sejdini.
Ajo që bie në sy është fakti se ende nuk dihet fati i Vangjush Dakos, kryebashkiakut të Durrësit, emir i të cilit rezulton i përfshirë edhe në dosjen tashmë të njohur si 339.
E ndërsa në anën tjetër Erjon Veliaj ka bërë fakt të kryer rikandidimin, madje duke njoftuar edhe për hapjen e fushatës, në një kohë kur nuk dihet nëse zgjedhjet do të mund të bëhen më 30 qershor, pasi opozita është duke protestuar bashkë me qytetarët, për Dakon gjithçka duket se është e pavendosur, ose do të jetë një vendim i minutës së fundit.
Pyetja që lind është përse Edi Rama, kryetar i PS-së dhe kryeministër, mban në ankth Vangjush Dakon?
Nga opozita ka pasur akuza të vazhdueshme dhe deklarata se Rama ka penguar arrrestimin e Dakos, duke e lidhur këtë me përgjimet për dosjen 339, ku ai është kapur duke komunikuar me grupe kriminale për procesin zgjedhor. Në akuzat e opozitës përfshihet edhe ajo që Fatmir Xhafaj u largua nga posti i ministrit të Brendshëm, pikërisht se do të arrestonte Dakon, ndërsa ky i fundit ka mohuar kategorikisht akuzat, madje ka deklaruar se i ka duart si akullore.
Dako konsiderohet si një ndër pikat e forta të Kryeministrit Rama, që ndoshta moskandidimin e tij do ta lidhë me faktin se ka 3 mandate në krye të bashkisë, megjithëse KQZ nuk arriti të miratonte pr/vendimin që kufizonte rikandidimin e kryebashkiakëve që kishin një numër të tillë mandatesh.
Ndoshta për shkak të një presioni ndërkombëtar, që po vjen në rritje, Rama dhe mazhoranca e tij qeverisëse, mund të mos rikandiojnë Dakon, ndërsa ky i fundit nuk ka përjashtuar mundësinë e një tjetër funksioni.
Programi i Kongresit të PS
BASHKITË QË DUAM PËR SHQIPËRINË QË DUAM
PROGRAMI I KONGRESIT ELEKTORAL TË PARTISË SOCIALISTE
23 Mars 2019
08.30 – Rregjistrimi i delegatëve
09.45 – Përfundimi i hyrjes së delegatëve
10.00 – Hapja e Kongresit. Seanca e Parë.
• Fjala hyrëse nga Sekretari i Përgjithshëm i PS Taulant Balla.
• Bashkëqeverisja me Njerëzit:
o Zëvendës Kryeministri Erjon Braçe
o Ministri Drejtësisë Etilda Gjonaj
o Dëshmitarë të shumë rasteve suksesi të bashkëqeverisjes me njerëzit
• Puna e Qeverisë për Bashkitë që Duam. Prezantime sektoriale:
o Ministri i Bujqësisë dhe Zhvillimit Rural Bledi Cuci
o Ministri i Energjisë dhe Infrastrukturës Belinda Balluku
o Ministri i Shëndetësisë dhe Mbrojtjes Sociale Ogerta Manastirlliu
o Ministri i Arsimit, Sportit dhe Rinisë Besa Shahini
o Ministri i Turizmit dhe Mjedisit Blendi Klosi
o Ministri i Kulturës Elva Margariti
• Bashkitë që Duam:
o Kryetari i Bashkisë Fier Armando Subashi,
o Kryetari i Bashkisë Korçë Sotiraq Filo,
o Deputeti i Lezhës Pjerin Ndreu,
o Kryetari i Bashkisë Vlorë Dritan Leli
o Kryetari i Bashkisë Roskovec Majlinda Bufi
o Prefekti i Qarkut Elbasan Gledian Llatja
• Shqipëria në Bashkimin Europian:
o Ministri për Europën dhe Punët e Jashtme Gent Caka
o Ministri për Marrëdhëniet me Parlamentin Elisa Spiropali
• Miratimi i Deklaratës së Kongresit
12.00 – Seanca e Dytë
“BASHKIA QE DUAM” – Tirana
• Fjala hyrëse nga Kryetarja e PS Tiranë Blerina Gjylameti.
• Kryetari i Bashkisë Tiranë Erion Veliaj dhe prezantimi I listës së kandidatëve të PS për anëtarë të Këshillit Bashkiak Tirane
• Fjala e Kryeministrit të Shqipërisë, Kryetarit të PSSH EDI RAMA
13.30 – Përfundimi i Seancës së Dytë
15.00 – Seanca e Tretë e ndarë në tre panele.
• Bashkitë që Duam për Shqipërinë që Duam – Pallati i Kongresve
• Edukim Cilësor dhe Punësim për të Rinjtë – Pallati i Kongresve
• Reforma Zgjedhore dhe Vota e Emigrantëve – Hotel Sheraton
17.00 – Mbyllja e punimeve.
/Boldnews.al/
