Të jesh interist nuk je normal, të enjten mund të turpërohesh në Europa League të dielën zgjohesh dhe fiton derbin. Të martën lexon se klubi është duke projektuar një dyshe Martinez-Dybala ndërsa të mërkurën mëson se Dybala nuk ka ndërmend të transferohet në Milano, Inter është një fanellë që nuk e josh për momentin.
Dybala shihej edhe nga Juventus si “xholi” për të arritur tek Icardi, një operacion që mund të ulte kostot e këtij transferimi por në këtë pikë pëlqimi i Dybala pritet të jetë përcaktues. Aktualisht Dyba përfiton tek Juventus 7 milion euro neto ndërsa te Inter maksimumi që mund të shkojë është 8,5/9 milion euro, një diferencë jo e madhe ndërsa edhe për Inter do të ishte e vështirë ti ofrojë një pagë të tillë një lojtari që në 4 vite ka shënuar 56 gola.
Nëse largohet nga Juventus, Dybala mund ta bëjë për një klub dhe një projekt më të madh, në këtë pikë në skenë dalin dy ekipe nga Premier League, Man.United dhe Man.City, dy klube që kanë buxhetin e mjaftueshëm për të përballuar si koston e kartonit ashtu edhe pagën e tij. Dybala pëlqehet shumë edhe në La Liga, më saktë pëlqehej shumë përpara dy vitesh, pasi tani si Barcelona ashtu edhe Real Madrid kanë të tjerë objektiva në merkaton e verës.
