Nga Boldnews.al
As që e kishte menduar se në tre muaj si ministër, qytetarët do i dilnin në rrugë për të protestuar ndaj tij. Gjeneralit Sandër Lleshaj i kanë “rënë spaletat” që në kohën kur vendosi të ishte një “ushtar” më shumë nën udhrat e kryeministrit Edi Rama. Situata politike në vend nën fluksin e protestave dhe një keqmenaxhim i dukshëm i strukturave të rendit, kanë kthyer shigjetat reagues edhe ndaj Ministrit të Brendshëm.
Në Universitetin e Durrësit ministri Lleshaj u nis i qetë për një takim, por është pritur me protestë nga studentët: “Për çfarë vini këtu, ju na keni helmuar me gaz- çfarë masash do merrni ndaj nesh, do na arrestoni?”-kanë ironizuar studentët. Por ministri nuk ka “ulur kokë”, duke iu kthyer me një lloj hakërrimi me fjalë aspak të përgjedhura për staturën e një pushtetari: “Ju e caktoni se ku shkoj unë”-është përgjigjur Lleshaj dhe më pas në kor janë dëgjuar thirrjet e një grupi studentësh: “Jeni qeveri ilegjitime! Shteti ka rënë! Dhe ju vetëm sa ne keni helmuar me gaz asgjë tjetër s’keni bërë! Turp, turp, turp…”.
Një incident në dukje i vogël, por është treguesi se protesta dhe revolta ndaj qeverisë është në pikën e vlimit. Arroganca e pushtetit, aferat e shumta korruptive, padrejtësitë ndaj qytetarëve dhe pandëshkueshmëria ndaj zyrtarëve, duket se janë faktorët që po lëkundin fort këmbët, sado të gjata të kryeministrit Rama.
E gjithë pjesa tjetër e ministrave, është një garniturë në pjatën e kryeqeveritarit, që më shumë se të qeverisë me akte, nisma dhe strategji për të nxjerrë vendin nga kriza ekonomike, papunësia dhe emigracioni masiv, trash çdo ditë nën forcën e pushtetit shkeljet ligjore dhe aferat e rënda të korrupsionit.
Vendi nuk mbahet më nën diktatin e propagandës. As mjeshtri i mjeshtrave Lali Eri i Tiranës që jeton vetëm me imazh për të krijuar mirazh tek qytetarët, nuk mundet që tia dalë më. Tashmë edhe ai është një personazh i dalë boje, që lëviz me eskortë policie dhe një tufë truprojash civile nga pas.
Kur dy studentë tentojnë ti hedhin bojë në shenjë revolte urdhëron dhjetëra truproja ti mbajnë pend në bodrumet e bashkisë, dhunojnë dhe krijojnë terror. Frikë nga populli? Është pikërisht ky moment kur ndahet në atë vijën e hollë mes një regjimi autoritar me nuanca të forta diktatoriale.
Të mbrohesh nga qytetarët e tu, qofshin edhe opozitarë në bindje, nuk janë zgjidhja me një luguni truprojash nga pas, as terrori që mbillet, frika në pupull nuk ekziston. Për çfarë duhet të trembet një qytetar i papunë, i pashpresë, i varfër, me drejtësi të mohuar, me arrogancë qeveritare që e mbyt çdo ditë? Frika është ndër pushtetarë, që duke e ditur si kanë arritur deri aty më shumë se drejtësisë i tremben qytetarëve të thjesht.
Qeveria është në panik dhe kur gjendet në vështirësi tregon forcën. Mbyt protestues me gaz losjellës, përdor terror dhe dhunë policore në shoqërime dhe ndalime, pushtetarët e zverdhur prej frikës ngjishen pas rojeve të shtuara. Rilindje, ky duket pragu i agnisë!
