Pas Shqipërisë dhe Kosovës, një tjetër vend ballkanas ka në krye të federatës së futbollit një shqiptar. Zgjidhet për herë të parë në postin më të rëndësishëm të futbollit të vendit fqinj Muhamed Sejdini.
Ai është zgjedhur kreu i Federatës së Futbollit në Maqedoninë e Veriut, ku megjithëse ishte kandidati i vetëm në listë, ka pasur edhe kontestime nga anëtarët që kishin të drejtën e votës.
Megjithatë, nga 96 delegatë që duhet të votonin, të pranishëm në zgjedhje kanë qenë 90 ndërkohë që 8 delegatë kanë votuar kundër zgjedhjes së tij.
Sejdini zë vendin e Ilco Gjorgjioski në postin e presidentit, ndërsa ai ishte zv. president në 5 vitet e fundit.
Menjëherë pas zgjedhjes së tij, Armand Duka, kreu i FSHF-së, ka zgjedhur ta urojë kolegun e tij me këtë mesazh: Dua të ndaj me ju gëzimin dhe kënaqësinë time dhe Federatës Shqiptare të Futbollit për zgjedhjen në krye të Federatës së Futbollit të Maqedonisë Veriore të mikut tim Muhamed Sejdini. Kam besim të plotë se ky besim i dhënë për kolegun Sejdini do të ndihmojë në rritjen e mëtejshme të lëvizjes futbollistike në vendin fqinj.”
