Dhjetëra fëmijë dhe nëna kanë marshuar sot në bulevardin ‘Dëshmorët e Kombit’, në shenjë solidarizimi me vajzën e vogël e cila u helmua një ditë më parë me gazlotsjellës nga policia e Edi Ramës, vetëm pse ajo kërkonte lirinë dhe nuk është dakord me këtë rrënim që po i bëhet vendit.
Ish-deputetja demokrate, Albana Vokshi, ka postuar në Facebook, një album me fotogaleri nga protesta e sotme, ndërsa shkruan se fëmijët e dhanë sot mesazhin e tyre.
Ja postimi i Vokshit:
Marshimi i heshtur i fëmijëve dhe të rinjve
Vajza e vogël, e goditur dje në protestë me gaz lotsjellës, është bërë simboli i një proteste të heshtur të disa të rinjve dhe fëmijëve kundër sjelljes mizore dhe kriminale të policisë me qytetarët.
Fëmijët mbajtën kundragaz në fytyrë gjatë marshimit në bulevardin Dëshmorët e Kombit deri tek Ministria e Brendshme, ndërsa vajzat e reja që i shoqëronin, kishin stampuar në bluza portretin e vajzës së goditur me gaz lotsjellës, me mbishkrimin ”Rama si Asad. Mos i helmo fëmijët”.
Protesta e heshtur e fëmijëve u mbyll para Ministrisë së Brendshme, institucionit përgjegjës për përdorimin e lëndës helmuese kundër protestave qytetare. Fëmijët lanë aty kundragazët për t’i treguar qeverisë se në një vend normal protestuesit paqësorë, gratë dhe fëmijët nuk sulmohen me helme kimike.
