Nga Boldnews.al
Gjyqtari Kastriot Selita është i vetmi subjekt i listës prioritare, i cili nuk ka kaluar ende në procesin e Vetingut, rreth një vit e gjysëm pasi nisi rivlerësimi i gjyqtarëve dhe prokurorëve.
Gjyqtari Selita ishte kryetar i trupës gjykuese, e cila në Shkurt 2019 vendosi përfundimisht që shtetasi Bledar Valikaj, bashkëshort i deputetes së Partisë Socialiste, Ermonela Felaj, të emërohet prokuror, pas një procesi gjyqësor me institucionin e Presidentit të Republikës.
Kastriot Selita, i cili është edhe Kryetar i Gjykatës së Apelit Administrativ, u përzgjodh anëtar i Këshillit të Emërimeve në Drejtësi, në Nëntor 2017.
Për shkak të kësaj përzgjedhje, ai u përfshi në listën prioritare të Komisionit të Vetingut, së bashku me anëtarët e Gjykatës Kushtetuese, Gjykatës së Lartë, si edhe kandidatët për Këshillin e Lartë Gjyqësor dhe Këshillin e Lartë të Prokurorisë.
Komisioni i Vetingut hodhi shortin për caktimin e trupave gjyqësore për 57 zyrtarët e listës prioritare të subjekteve, ndër të cilët edhe për gjyqtarin Selita, në 1 Dhjetor 2017.
Prej asaj kohe, 56 gjyqtarë e prokurorë të listës prioritare kanë përfunduar përballjen me shkallën e parë të Vetingut. Madje, një pjesë e konsiderueshme kanë përfunduar edhe proceset në shkallën e dytë, në Kolegjin e Posaçëm të Apelimit.
Ndërkohë, për numrin 57 në atë listë prioritare, pra për gjyqtarin Kastriot Selita, komisioni i Vetingut nuk ka deklaruar ende përfundimin e procesit të rivlerësimit kalimtar.
Gjyqtari Kastriot Selita, ndër të tjera, ka qenë kryetar i trupës gjykuese, e cila në vitin 2016 vendosi që të urdhërojë Presidentin e Republikës për të emëruar “prokuror” shtetasin Bledar Valikaj, bashkëshorti i deputetes së Partisë Socialiste, Ermonela Felaj.
Bledar Valikaj, oficer i Policisë Gjyqësore, konkuroi për t’u emëruar në vitin 2015, në një konkurs të zhvilluar nga Prokurori i Përgjithshëm, bazuar në ligjin e asaj kohe.
Në përfundim të konkursit, Prokurori i Përgjithshëm i asaj kohe, Adriatik Llalla, i dërgoi për dekretim Presidentit të Republikës, Bujar Nishani, emrat e fituesve të konkursit, përfshirë edhe Bledar Valikajn.
Presidenti Nishani, bazuar në tagrat e tij kushtetues, nuk u shpreh për dekretimin e kandidaturës së Bledar Valikaj brenda 30 ditëve, duke e refuzuar në heshtje emërimin e tij si prokuror.
Valikaj, bashkëshort i deputetes Ermonela Felaj, i drejtohet Gjykatës Administrative, në të cilën kërkon që Presidenti të shprehet dhe të nënshkruajë dekretimin e tij si prokuror.
Me vendimin e datës 6 Shkurt 2019, trupa gjykuese e Apelit Administrativ, e drejtuar nga Kastriot Selita, vendosi përfundimisht që të urdhërojë Presidentin për të emëruar bashkëshortin e Ermonela Felaj në detyrën e prokurorit.
